Германия Бундестаги (парламенти) 16 декабрь куни бўлиб ўтган йиғилишда амалдаги канцлер Олаф Шольц ҳукуматига ишончсизлик вотумини қўллаб-қувватлади, деб ёзади Bild.
394 депутат парламентни тарқатиб юбориш ва янги сайловлар ўтказиш учун овоз берди, 207 нафари Шольцнинг вазирлар кабинетини қўллаб-қувватлади ва 116 нафари бетараф қолди. Ишончсизлик вотумига эришиш учун камида 367 овоз керак эди.
Овоз беришдан сўнг Шольц Германия президенти Франк-Вальтер Штайнмайерга парламентни расман тарқатиб юборишни таклиф қилди. У 21 кун ичида қарор қабул қилиши керак. Штайнмайер Бундестагни тарқатиб юбориши ва 23 февралда янги сайловларни тайинлаши кутилмоқда.
Шольц Бундестагга 11 декабрь куни — Социал-демократик партия (СДП), Эркин демократик партия (ЭДП) ва «Яшиллар»ни ўз ичига олган ҳукмрон коалиция парчаланганидан бир ой ўтгач, ҳукуматга ишонч сўровини юборди. У Шольц молия вазири, ЭДП раҳбари Кристиан Линднерни истеъфога чиқарганидан кейин парчаланиб кетди.
Германия конституцияси Бундестагнинг мустақил равишда тарқалиб кетишига йўл қўймайди, шунинг учун Шольц учун муддатидан олдин сайлов ўтказишнинг ягона йўли ҳукуматга ишончсизлик вотуми бўлди, деб тушунтиради BBC. Дастлаб Германияда парламент сайловлари сентябрь ойида ўтказилиши керак эди, аммо Шольц муддатидан олдин овоз бериш ўз партияси — СДПнинг сиёсий мавқеини тиклаш учун «энг яхши имконият» деб қарор қилди.
Социологик сўровларга кўра, ҳозирда етакчи ўринларни консерватив блок — Фридрих Мерц бошчилигидаги «Христиан-демократик иттифоқ» ва «Христиан-социал иттифоқ» (ХДИ/ХСИ) эгаллаб турибди. Иккинчи ўринда ўта ўнгчилар бўлган «Германия учун альтернатива». СДП учинчи, «Яшиллар» эса тўртинчи ўринда. Асосий партиялар анъанавий равишда «Германия учун альтернатива» билан коалиция тузишдан бош тортади, аммо унинг мавжудлиги «парламент арифметикасини мураккаблаштиради», бу эса бошқариш қийин бўлган коалицияларга айланиши мумкин, деб таъкидлайди Reuters.
- Ноябрь ойи охирида Шольц иккинчи муддатга ўз номзодини қўйишни режалаштираётгани маълум бўлганди. Унинг потенциал рақиби, Германия мудофаа вазири Борис Писториус бўлажак сайловларда Социал-демократик партиядан канцлерликка номзодини кўрсатишдан бош тортган ва Шольцни қўллаб-қувватлаган. Партия аъзолари аввалроқ Шольцнинг оммабоп эмаслиги сабабли Писториусни ўз номзодини қўйишга чақирганди.
