Фарғонада заправкадаги портлаш оқибатида яна 3 кишининг ўлгани тасдиқланди. Бу ҳақда вилоят Ички ишлар бошқармаси матбуот хизмати хабар берди.
Қайд этилишича, Petrolium пропан газ қуйиш шохобчасида 5 метр куб сиғимли контейнерга газ қуйиш жараёнида ёриқ келиб чиққан. Оқибатда газ моддаси ташқарига сизиб чиққан, сўнгра портлаш ва ёнғин содир бўлган.
Ҳодиса оқибатида аввалроқ бир киши вафот этгани, тўрт киши жароҳатлангани ва яна саккиз киши тиббий назорат остига олингани ҳақида хабар берилганди. ИИБга кўра, шифохонага ётқизилган беморлардан 3 нафари кўрсатилган тиббий ёрдамга қарамасдан вафот этган.
Ҳолат юзасидан Жиноят кодексининг 257-моддаси (Меҳнатни муҳофаза қилиш қоидаларини бузиш) 3-қисми «а» банди ҳамда 259-моддаси (Ёнғин хавфсизлиги қоидаларини бузиш) 3-қисми «а» банди билан жиноят иши қўзғатилди. 5 киши процессуал тартибда қамоққа олинди, 2 нафар шахсни ушлаш чоралари кўрилмоқда.
Ҳодиса бўйича тегишли экспертизалар тайинланган бўлиб, тергов ҳаракатлари олиб борилмоқда, дейилади хабарда.
Эслатиб ўтамиз, ҳодиса 17 декабрь соат 13:45 ларда содир бўлган. Вилоят ФВБ хабарига кўра, ёнғин-қутқарувчилар у ерга 13:47 да етиб борган. Ҳудуд 14:02 да ўраб олиниб, 14:12 да ёнғин батамом ўчирилган. Тармоқларда фуқаролар ёнаётган одамни ўчириш учун ўт ўчиргичдан фойдаланаётгани ва ёнаётган машиналар акс этган сурат ва видеолар тарқалганди.
