Украина президенти Владимир Зеленский Украина армияси ўз кучи билан Қрим ва Донбассни қайтариб ололмаслигини айтди. Бу ҳақда у Франциянинг Le Parisien газетасига берган интервьюсида маълум қилди.
Нашр Зеленскийдан урушни тугатиш учун қандай муросага боришга тайёрлигини сўради. «[Қрим ёки Донбассни, ҳеч бўлмаганда вақтинча] беришга тайёрмисиз?» — деди газета журналисти.
«Биз ўз ҳудудларимизни бериб юборолмаймиз. Украина Конституцияси бунга йўл қўймайди. Де-факто, бу ҳудудлар ҳозир россияликлар томонидан назорат қилиняпти. Уларни қайтариб олишга кучимиз етмайди. Биз Путинни музокаралар столига ўтиришга мажбур қилиш учун фақат халқаро ҳамжамиятнинг дипломатик босимидан умид қилишимиз мумкин. Ҳайронман: бизни қўллаб-қувватлаётган Ғарб нега унга бунчалик ғамхўрлик қилмоқда?
Нега биз уруш бошиданоқ оммавий равишда қуроллантирилмадик? Менинг нутқим ҳақоратли туйилиши мумкин. Аммо менда шундай таассурот борки, ҳамма Путин Россиясидан қўрқадигандек. У жазосиз қолмоқда. Путинга босим ўтказиш ва бу урушни тўхтатиш учун бизга кучли Америка ва Европа керак», — деди Зеленский.
Зеленскийдан, шунингдек, у Владимир Путин билан музокаралар столига ўтиришга тайёрми, деб сўрашди. «Қарама-қарши ўтирган одам муҳим эмас. Музокаралар олиб бораётганингизда қандай ҳолатда эканингиз муҳим. Биз заиф позицияда эмасмиз, лекин кучли позицияда ҳам эмасмиз. НАТОга кирамизми? Билмаймиз. Европа Иттифоқининг бир қисми бўламизми? Ҳа, келажакда, лекин қачон?»
Зеленскийнинг таъкидлашича, ҳеч бир жаҳон етакчиси «Путин билан Украинасиз музокара олиб боришга ҳақли эмас». «Биз бу мандатни ҳеч кимга бермадик. Биз — қурбонлармиз», — деди Зеленский.
Зеленскийга кўра, Путин кўплаб украиналикларни, шу жумладан, тинч аҳолини ҳам ўлдирди.
«У ҳар куни шундай қилишни давом эттирмоқда. У ракеталар билан зарба йўллайди, қийноқлар беради, тарихий биноларни вайрон қилади, ерларимизни эгаллайди, миллионлаб одамларни ўлдиради. Саккиз миллион украиналик сургун қилинди, яна миллионлаб одамлар вайрон бўлган уйларини тарк этишга мажбур бўлди. Бўлиб ўтган воқеаларни унута олмаймиз. Жазосиз қолинаётгани учун бошқа диктаторлар ҳам бундан илҳомланиши мумкин. Бу, шунингдек, Путинга ортга қайтиш имкониятини беради. Чеченистон, Грузия, Молдова, Сурия, Африкада ҳам шундай қилди. Путин бумеранг: у хоҳлаган нарсасига эришмагунча қайтиб келаверади. Ўттиз йиллик ҳукмронлиги давомида биринчи марта бир мамлакат унга қаршилик кўрсатмоқда», — деди Украина президенти.
Аввал ҳам Зеленский Украина армиясининг Россия томонидан босиб олинган ҳудудларни озод қилиш учун кучлари етарли эмаслигини айтганди. У Украина хавфсизлик кафолатларини олиши ва можарони дипломатик йўл билан ҳал қилиш кераклигини билдирган.
- Украина ҳукумати декабрь ойида АҚШнинг сайланган президенти Дональд Трампнинг жамоаси билан Россия-Украина урушини тўхтатиш бўйича музокараларни бошлаган, у бир неча бор ушбу можарони тезда тугатишга тайёрлигини айтган. Зеленский 7 декабрь куни Трамп билан Парижда учрашди, учрашувни Франция президенти Эммануэль Макрон ташкил қилди.
- Париждаги музокаралардан сўнг Трамп томонларни ўт очишни тўхтатишга ва музокараларни бошлашга чақирди. Кремль Россия музокаралар учун очиқлигини, аммо музокараларни бошлаш учун Украина ҳукумати Россия раҳбарияти билан алоқа қилиш тақиқини бекор қилиши кераклигини айтди. Украина ҳукумати бир неча бор Россия музокараларга тайёр эмаслигини таъкидлаган.
