Тошкентда пулли автотураргоҳлар ташкил этиш ҳуқуқи учун ўтказилган биринчи аукционнинг асосий ва захира ғолиби ер ижараси бўйича шартнома имзоламагани сабабли уларнинг ғолиблиги бекор қилинди ва янги аукцион ўтказилиши белгиланди. Бу ҳақда E-auksion электрон платформаси офиси «Газета.uz»га маълум қилди.
Биринчи аукцион
25 ноябрь куни ўтказилган биринчи аукционда икки компания иштирок этган. Улар 2 соат 10 дақиқа давомида 22 та таклиф берган. Натижада 86 та ер участкасини ўз ичига олган, умумий узунлиги 111,6 км бўлган лот учун 120,15 млрд сўм таклиф қилган Balcomuz ғолиб бўлган.
«Газета.uz» сўровига жавобан E-auksion`нинг аниқлик киритишича, аввалги ғолиб ижара шартномасини белгиланган муддатда имзоламаган. Шу муносабат билан ғалаба бекор қилинган. 572 млн сўм миқдоридаги омонат куйиб кетган, Balcomuz компанияси 12 ойга аукционларда иштирок этишдан четлатилган.
Шу билан бирга, ташкилот аввалги аукционда захира ғолиби аниқланган, аммо у ҳам шартнома имзоламаганини ва унинг омонати ҳам куйиб кетганини қайд этди.
«Газета.uz» иккинчи иштирокчининг номини аниқлай олмади. Шундай қилиб, кимошди савдосининг иккала иштирокчиси ҳам шартнома тузишдан бош тортган.
Авваллари аукционнинг асосий ва захира ғолиблар дарҳол эълон қилинарди. Бироқ электрон онлайн-аукцион ва танловларни ташкил этиш ва ўтказиш тартибига ўзгартиришлар киритилгандан сўнг захира ғолиб асосий ғолиб шартнома тузишдан бош тортгандан кейингина эълон қилинадиган бўлди.
Айни пайтда эски лот нофаол ҳолатга келгани сабабли асосий ва захира ғолиблар аукцион натижалари саҳифасида кўрсатилмаяпти.
Такрорий аукцион
17 декабрь куни E-auksion`да Тошкент шаҳри кўчалари бўйлаб пулли автотураргоҳларни ташкил этиш ҳуқуқи учун қайта савдо ўтказилди.
Кимошди савдоси 20 дақиқадан озроқ давом этди ва иккита таклифдан сўнг якунланди, гарчи учта иштирокчи тендерда иштирок этган бўлса ҳам. Ғолиб Streetpark Systems компанияси бўлди, у бошланғич нарх (57,2 млрд сўм)дан 10 фоиз кўпроқ, яъни 62,93 млрд сўм таклиф қилди. Аммо бу сумма Balcomuz ва аввалги савдолардаги иккинчи иштирокчи томонидан таклиф қилинган суммадан деярли икки баробар камроқни ташкил этади.
«Газета.uz» бир ойдан сал кўпроқ вақт олдин — 2024 йилнинг 13 ноябрь куни рўйхатдан ўтган Streetpark Systems компанияси таъсисчилари ҳақида батафсил ёзган эди.
Пулли автотураргоҳлар ҳақида
13 ноябрь куни «Газета.uz» Тошкентда пулли автотураргоҳларни ташкил этиш ҳуқуқини берувчи аукцион эълон қилингани ҳақида хабар берганди.
Битта лот доирасида шаҳарнинг барча туманларида жами 262,8 минг квадрат метр майдонни ижарага бериш режалаштирилган. Шундан 6571,3 квадрат метри метро бекатларидан 200 метр радиусда жойлашган. Топографик харитага кўра, гап умумий узунлиги 111,6 километр бўлган 86 участка ҳақида кетмоқда.
Ҳудудларнинг катта қисми Миробод (71,9 минг кв.м), Яккасарой (36,5 минг кв.м), Сергели (29,5 минг кв.м), Шайхонтоҳур (27,8 минг кв.м) ва Олмазор (26,7 минг кв.м) туманларида жойлашган.
Ижара муддати 36 ойни ташкил этади. Дастлабки икки йил ичида ижарачи автотураргоҳларни жиҳозлаш, паркоматлар ва ҳаракатни ташкил этиш воситаларини ўрнатиш, шунингдек, коммуникация ва алоқани амалга ошириш учун камида 5 млн доллар сармоя киритиши керак.
Йиллик ижара бошланғич нархи, юқорида таъкидланганидек, 57,21 млрд сўмни ташкил этади.
