Ўзбекистон президенти Шавкат Мирзиёев 20 декабрь куни тадбиркорликни қўллаб-қувватлаш бўйича 2024 йил якунлари ва 2025 йил учун режаларга бағишланган видеоселектор йиғилишини ўтказмоқда, дея хабар берди давлат раҳбари матбуот котиби Шерзод Асадов.
«Кенг кўламли ислоҳотларимизнинг илк кунларидан бошлаб мен бир фикрни доим таъкидлаб келаман: тадбиркорликни ривожлантириш — биз учун стратегик вазифа. Бизнинг таянчимиз ҳам, суянчимиз ҳам, энг катта кучимиз ҳам шу соҳада мужассам. Шу боис тадбиркорларни қўллаб-қувватлаш марказдан тортиб энг қуйи бўғингача — барча раҳбарларнинг кундалик иши бўлиши шарт», — деди президент нутқи бошида.
Шавкат Мирзиёев ҳокимлар ҳар бир тадбиркор билан кўпроқ мулоқот қилиб, корхоналарга бориб, уларнинг дарди билан яшаши кераклигини таъкидлади.
Унинг сўзларига кўра, Тадбиркорларни қўллаб-қувватлаш бўйича жамоатчилик кенгаши аъзолари давлат ва тадбиркорлар ўртасида кўприк бўлиб, аниқ таклифларни ўртага қўйиб келмоқда. Натижада 2024 йилнинг ўзида тадбиркорлар фаолияти учун муҳим аҳамиятга эга бўлган 5 та қонун, 101 та фармон ва қарорлар қабул қилинган.
Президент кенгаш аъзоларига, улар орқали бутун ишбилармонлар ҳамжамиятига шу фаоллик учун миннатдорлик билдирди.
Молиялаштиришнинг кўпайиши
Давлат раҳбари сўнгги йилларда иқтисодиётда пул кўпайгани, инвестиция лойиҳаларини барқарор молиялаштиришнинг мустаҳкам асоси яратилганини таъкидлади.
Корхоналарнинг банклардаги маблағлари 20 трлн сўмга ошиб, 107 трлн сўмга етган. Аҳоли омонатлари ҳам 25 трлн сўмга кўпайиб, 105 трлн сўм бўлди.
Президент бу банклар барқарор ривожланаётгани, уларга аҳоли ва тадбиркорлар ишончи ортиб бораётганидан далолат эканини таъкидлади.
Йил якуни билан ажратилган жами кредитлар 275 трлн сўмни ташкил қилиши, 2025 йилда бу 300 трлн сўмдан ошиши ҳисоб-китоб қилингани айтилди.
Президент кичик бизнесга бериладиган кредитлар улуши ҳозирги 28 фоиздан 40 фоизга оширилиб, 120 трлн сўмга етказилишини таъкидлади.
2025 йилда Ўзбекистон банклари тадбиркорлар эҳтиёжидан келиб чиқиб четдан давлат кафолатисиз 6 млрд доллар жалб қилишни режалаштирмоқда.
Янги факторинг тизими кенг йўлга қўйилгани натижасида шу йилнинг ўзида 100 млн долларлик шундай хизматлар кўрсатилган.
Инфратузилма ва энергоресурслар
Бизнес учун йўл, сув, электр, газ, темирйўл каби инфратузилма объектларини яхшилашга 2024 йилда 35 трлн сўм йўналтирилган. 2025 йил бунга яна 43 трлн сўм ажратиш режалаштирилган.
2024 йилда электр ишлаб чиқариш 82 млрд киловатт-соатга етди. Бу йил ишга тушган 6,3 млрд долларлик 17 та йирик «яшил» ва янги технологияга асосланган энергия қувватлари ҳисобига 2025 йилда қарийб 90 млрд киловатт-соат электр ишлаб чиқарилади.
2025 йилда яна 6,4 млрд долларлик 25 та лойиҳа доирасида 4,8 гигаватт янги қувватлар барпо этилиши айтилди.
Давлат раҳбари энди энергия соҳасида ҳам рақобатли бозорга ўтиш вақти келганини қайд этди. Ҳозирда мамлакатда мустақил энергия ишлаб чиқарувчилар сони 24 тага етган. 2025 йилда илк бор электр энергиясининг онлайн улгуржи бозори ишга тушади.
