АҚШ президенти маъмурияти яқин кунларда Украинага янги ҳарбий ёрдам пакети ажратилишини эълон қилмоқчи, деб хабар берди Reuters 20 декабрь куни манбаларга таяниб. Ушбу пакет Жо Байден маъмуриятининг Украинани тўғридан-тўғри қўллаб-қувватлаш бўйича сўнгги қадамларидан бири бўлиши мумкин.
Манбаларга кўра, АҚШ Украина хавфсизлигига кўмаклашиш ташаббуси (Ukraine Security Assistance Initiative, USAI) доирасида 1,2 миллиард доллар миқдорида ёрдам беради, унинг доирасида Пентагон ишлаб чиқарувчилар билан шартномалар тузади, ўз захираларидан техника ва қурол-яроғларни тақдим этмайди. USAI доирасида қурол етказиб бериш учун ойлар ёки йиллар кетиши мумкин.
Reuters суҳбатдошларидан бирининг таъкидлашича, пакетга ҳаво ҳужумидан мудофаа тизимлари ва артиллерия снарядлари киради. Давлат департаменти ва Пентагон мавжуд вазият юзасидан изоҳ беришдан бош тортди.
Сўнгги ҳафталарда АҚШ Украинага ҳарбий ёрдамини тез-тез эълон қила бошлади. Қўшма Штатларда Украинага қурол-яроғ ва бошқа ҳарбий ёрдам етказиб бериш учун Конгресс томонидан ажратилган 5,6 миллиард доллар қолди. Пентагон Байден маъмурияти барча тасдиқланган ёрдамни етказиб беришга улгурмайди, деб ҳисоблайди, деб ёзди The New York Times 17 декабрь куни.
Ўтган ҳафта АҚШ Украинага 500 млн долларлик ёрдам пакетини ажратганди. 73-ёрдам пакетига HIMARS учун ўқ-дорилар, артиллерия ўқ-дорилари, танкка қарши тизимлар, биологик ҳимоя ускуналари ва дронлар кирган.
АҚШнинг сайланган президенти Дональд Трамп аввалроқ 2025 йил 20 январда ўз лавозимига киришганидан кейин Россия-Украина урушини тезда, 24 соат ичида тугатишга тайёрлигини айтган эди. Трамп маслаҳатчиларининг режаларидан бири, агар Украина Россия билан музокаралар бошламаса, АҚШ уни ҳарбий ёрдамдан маҳрум қилади, деб тахмин қилмоқда. 8 декабрь куни NBC News нашрига берган интервьюсида Трамп Оқ уйга қайтганидан кейин Украина АҚШдан аввалгидек кўп ҳарбий ёрдам олмаслигини билдирган.
2022 йил февраль ойида Россия қўшинларининг Украинага кенг кўламли бостириб кириши бошланганидан бери АҚШ Киевга 175 миллиард доллар, шу жумладан, хавфсизлик соҳасида ёрдам учун қарийб 61,4 миллиард доллар йўналтирган, деб ёзади Reuters.
