Янгиланди: АҚШ президенти Жо Байден федерал ҳукумат фаолиятини молиялаштиришни давом эттириш тўғрисидаги қонунни имзолади.
АҚШ Конгресси Сенати 21 декабрга ўтар кечаси ҳукумат фаолиятини молиялаштиришни узайтирувчи қонун лойиҳасини ёқлаб овоз берди, деб хабар бермоқда CNN. Ҳужжатни конгресс юқори палатасининг 85 аъзоси қўллаб-қувватлади, 11 нафари қарши чиқди.
Сенаторлар қонун лойиҳасини маҳаллий вақт билан ярим кечадан кейин (21 декабрь соат 8:00 да) овозга қўйди. Техник жиҳатдан бу молиялаштириш муддати тугаганидан кейин содир бўлди, аммо ҳужжатнинг қабул қилиниши ҳукумат идоралари ишини тўхтатиб қўйишдан қочиш имконини берди.
Вакиллар палатаси, конгресснинг қуйи палатаси қонун лойиҳаси учун 20 декабрь куни кечқурун овоз берди. 366 нафар конгрессмен ёқлаб, 34 нафари қарши овоз берди. Шу ҳафтанинг бошида Вакиллар палатаси икки марта қонун лойиҳасини қабул қила олмаганди.
Қонун лойиҳаси Конгресснинг иккала палатаси томонидан маъқулланганидан сўнг у АҚШ президенти Жо Байденга юборилди.
Ўтган йили федерал ҳукумат тахминан 6,2 триллион доллар маблағ сарфлади ва ҳозирда 36 триллион доллардан ортиқ қарзи мавжуд, деб ёзади Reuters. Конгресс келаси йил ўрталаригача қўшимча қарз олишга рухсат бериш бўйича қарор қабул қилиши зарур бўлади.
Янги қонун лойиҳаси ҳукумат молиялаштиришини 14 мартгача узайтириш, табиий офатлардан зарар кўрган штатлар учун 100 миллиард доллар ва фермерлар учун 10 миллиард доллар ажратишни кўзда тутади. Шунингдек, йил охирида муддати тугайдиган қишлоқ хўжалиги ва озиқ-овқат ёрдами дастурларини узайтириш ҳам режалаштирилган. Лойиҳа АҚШнинг сайланган президенти Дональд Трамп эришмоқчи бўлган давлат қарзи чегарасини оширмайди.
Қонун лойиҳаси ҳақида
Федерал идораларни молиялаштириш муддати узайтирилмаса, АҚШ ҳукуматида ишни тўхтатиш (шатдаун) хавфи юзага келиши мумкин эди, аммо бундай бўлмади.
Қонун лойиҳасида ҳукумат молиялаш муддатини уч ойга узайтириш, табиий офат оқибатларини бартараф этиш учун 110 миллиард доллар ва ҳукумат қарзининг чегарасини 2027 йил январигача икки йилга тўхтатиб туриш кўзда тутилганди. Қарз лимитини бекор қилиш сайланган президент Дональд Трампнинг талаби эди — бу унга сайлов кампанияси давомида ваъда қилинган солиқ ислоҳотини амалга ошириш, солиқларни кескин қисқартириш имконини беради.
Ҳужжат Трамп ва миллиардер Илон Маск Вакиллар палатаси спикери Майк Жонсон демократлар билан эриша олган аввалги икки партиявий келишувни танқид қилганидан кейин Республикачилар партияси томонидан шошилинч равишда таклиф қилинган. CNN ҳисоб-китобларига кўра, Маск ўзининг Х ижтимоий тармоғида (собиқ Twitter) сайлов куни кўп ойлар давомида тайёрланаётган икки партиявий келишувни танқид қилувчи 92 та пост эълон қилган.
