АҚШ Иммиграция ва божхона хизмати жорий йилнинг январь-сентябрь ойларида 572 нафар Ўзбекистон фуқаросини мамлакатдан чиқариб юборди, дейилади Америка ташкилоти ҳисоботида.
Бу 2023 йилнинг январь-сентябрь ойларидаги кўрсаткичдан 6,5 баробар кўп, ўшанда 88 нафар Ўзбекистон фуқароси ватанига депортация қилинган. Таққослаш учун: 2022 йилнинг ушбу даврида 55 та депорт қайд этилган, 2021 йилда — 21, 2020 йилда — 49, 2019 йилда — 45.
Умуман олганда, АҚШ 271,5 мингга яқин чет эл фуқаросини мамлакатдан чиқариб юборди, бу ўтган йилнинг тўққиз ойига нисбатан 1,9 баробар кўп. Бу маълумотлар АҚШнинг иммиграция сиёсати кескинлашганидан далолат беради.
Депортациялар сонининг кўпайишига бир қанча омиллар сабаб бўлди. Буларга йўловчилар рўйхатини билдириш бўйича қисқартирилган талаблар ва дам олиш кунлари чартер рейсларини амалга ошириш имконияти киради.
Хусусан, АҚШ ташкилотларининг «интенсив дипломатик саъй-ҳаракатлари» Шарқий яримшарда чартер рейслари сонининг кўпайишига олиб келди. 2018 йилдан бери Хитойга биринчи йирик депортация чартер рейслари, шунингдек, Албания, Ангола, Миср, Грузия, Гана, Гвинея, Ҳиндистон, Мавритания, Руминия, Сенегал, Тожикистон ва Ўзбекистонга рейслар шулар жумласидар.
Ўзбекистон депортация қилинганлар сони бўйича Россия, Марказий Осиё давлатлари ва бошқа қатор давлатлардан олдинда:
- Россия — 464;
- Афғонистон — 132;
- Тожикистон — 77;
- Қирғизистон — 69;
- Украина — 53;
- Арманистон — 27;
- Қозоғистон — 23;
- Озарбайжон — 13;
- Туркманистон — 5.
Депортация қилинганлар сони бўйича етакчи давлатлар Мексика (87 298), Гватемала (66 435), Гондурас (45 923), Сальвадор (15 284), Колумбия (14 268) ва Эквадор (12 921) бўлиб, уларга ўн минглаб муҳожирлар депортация қилинган.
2023 йил октябрь ойида АҚШ божхона ва чегара хизмати 13,6 мингдан ортиқ Ўзбекистон фуқароси Мексика орқали АҚШга киришга уринган вақтда қўлга олингани ҳақида хабар берган эди. Ноябрда АҚШ Мексика орқали киришга уринаётган Ўзбекистон фуқароларини мамлакатга киритишни тўхтатишини эълон қилган эди. Бунинг ўрнига улар билан боғлиқ иммиграция иши ҳал қилингунга қадар ҳибсда сақланади.
Ўтган йилнинг декабрида АҚШга ноқонуний киришга уринган 120 га яқин Ўзбекистон фуқароси ватанига қайтарилган эди. Фуқароларнинг аксарияти Мексика орқали чегарани кесиб ўтишга ҳаракат қилган.
