Эрон ҳукумати WhatsApp мессенжери ва Google Play иловалар дўконига киришни блокдан чиқаришга қарор қилди, деб хабар бермоқда IRNA агентлиги.
Қарор Ахборот хавфсизлиги бўйича Олий кенгашда кўпчилик овоз билан маъқулланди. Шу билан бирга, Олий кенгашда кибермаконда тартибга солинадиган бошқарув муҳимлиги ва маҳаллий платформаларни қўллаб-қувватлаш зарурлиги таъкидланди.
Фото: IRNA
Ахборот ва коммуникация технологиялари вазири Саттар Ҳошимий кейинроқ ўзининг Х саҳифасида шундай ёзди: «Бугун биз бирлик ва ҳамкорлик билан интернет чекловларини бекор қилиш бўйича биринчи қадамни қўйдик. Президентга, оммавий ахборот воситалари ва фаолларга бу борадаги саъй-ҳаракатлари учун миннатдорлик билдираман. Бундай бирдамликка ҳар қачонгидан ҳам кўпроқ муҳтожмиз. Бу йўл давом этади».
Bloomberg`нинг таъкидлашича, 2024 йил июль ойида Эрон президенти бўлган Масъуд Пезешкиён сайловолди кампанияси давомида интернет-цензурани юмшатишга ваъда берганди. «Эрон ҳукумати интернетга нисбатан шафқатсиз муносабатда бўлгани учун йиллар давомида эронликлар, Ғарб ҳукуматлари, Бирлашган Миллатлар Ташкилоти ва сиёсий фаоллар томонидан танқидга учраб келади. Расмийлар — уларнинг аксарияти тақиқланган ижтимоий тармоқларда ўзларининг оммавий ҳисобларини юритиш учун фойдаланади — кўпинча цензурани камайтириш ҳақидаги ваъдаларини бажармайди. Бунинг ўрнига, сўнгги 10 йил ичида сезиларли даражада ошди», — деб ёзади нашр.
WhatsApp, Google Play, шунингдек, Instagram Эронда 2022 йил кузида 22 ёшли Маҳса Аминийнинг ўлими ортидан бошланган норозилик намойишларидан сўнг блокланган. Ахлоқ полицияси уни ҳижобни «нотўғри» ўрагани учун ҳибсга олганди. Мамлакатда Facebook, X ва YouTube 2009 йилда тақиқланган. Эронда, шунингдек, TikTok ва Telegram блокланган.
Bloomberg маълумотларига кўра, Эрон ҳукумати аҳолининг норозилигини ҳисобга олиб, чекловларнинг бир қисмини бекор қилишга қарор қилган. Бундай қарорга келишига сабаб, мамлакат Ғазодаги ҲАМАС ва Ливандаги «Ҳизбуллаҳ»ни қўллаб-қувватлагани учун Исроил билан можарога боргани бўлган.
