29 декабрь куни Озарбайжон президенти Илҳом Алиев Ақтауда ҳалокатга учраган Azerbaijan Airlines`нинг Боку-Грозний рейси экипажи аъзолари билан видолашув маросимида иштирок этди. Озарбайжон телевидениеси билан интервьюсида у бир қатор баёнотларни берди, деб хабар қилди Азертадж агентлиги.
«Албатта, қора қутилар очилгандан кейин якуний версия маълум бўлади. Аммо дастлабки тахминлар ҳам етарли даражада асосланган ва фактларга эга. Фактлар эса шундан иборатки, Озарбайжон фуқаро самолёти Россия ҳудудида, Грозний шаҳри яқинида ташқи таъсирдан шикастланган ва деярли бошқарувни йўқотган. Биз, шунингдек, самолётимиз радиоэлектрон кураш воситалари ёрдамида бошқариб бўлмайдиган ҳолатга келтирилганини ҳам биламиз. Бу самолётга етказилган биринчи зарар», — деди президент.
Илҳом Алиевнинг қўшимча қилишича, ердан узилган ўқ самолётнинг дум қисмига ҳам жиддий зарар етказган. Самолётнинг бутун корпуси тешилгани қушлар тўдаси билан тўқнашув версиясини кун тартибидан бутунлай олиб ташлаган. У Россиянинг баъзи доиралари ушбу версияга амал қилишни афзал кўрганини афсус билан таъкидлади:
«Бизни хафа қилган ва ҳайратга солган жиҳатлардан бири шундаки, Россия расмий тузилмалари қандайдир газ баллонининг портлаши ҳақида тахминларни илгари сурди. Яъни бу Россия томони масалани бостиришни хоҳлаётганини очиқ кўрсатди ва бу, албатта, ҳеч кимга шараф олиб келмайди», — деди Озарбайжон президенти.
У, албатта, самолёт атайлаб уриб туширилмаганини таъкидлаб, Россиянинг ўз айбини тан олиши, дўст давлат ҳисобланган Озарбайжондан вақтида кечирим сўраши ва буни жамоатчиликка етказиши — буларнинг барчаси амалга оширилиши керак бўлган чора ва қадамлар эканини айтди.
«Афсуски, дастлабки уч кун давомида Россиядан тутуруқсиз версиялардан бошқа ҳеч нарса эшитмадик», — деди Озарбайжон раҳбари.
«Такрор айтаман, қора қутилар очилгандан сўнг ва биз батафсилроқ маълумотга эга бўлганимиздан сўнг барча тафсилотлар пайдо бўлади ва бугунги кунда саволларни келтириб чиқарадиган кўплаб жиҳатлар ойдинлашади. Масалан, нима учун самолёт Грозний шаҳрига қўна олмади? Радиоэлектрон кураш воситалари самолётни бошқаришга қай даражада таъсир кўрсатди? Ҳаводаги зарба ва самолёт яқинидаги портлашнинг оқибатлари қанчалик таъсирда бўлган? Шуни ҳам таъкидламоқчиманки, ушбу аниқ фактни инкор этиш ва уни ушбу ҳолатда ниқоблашга уринишлар ҳам бемаънилик, ҳам аҳмоқликдир», — деди у.
Илҳом Алиев учувчиларнинг ҳаракатларини, уларнинг профессионаллигини, фидойилигини жуда юқори баҳолади: «Учувчилар бошқариб бўлмайдиган самолётни бошқаришда ҳам профессионаллик, ҳам қаҳрамонлик кўрсатди. Учувчилар тажрибали эди ва бу ҳалокатли қўнишда омон қолмаслигини ҳам билишарди. Бироқ йўловчиларни қутқариш учун улар жуда катта қаҳрамонлик кўрсатди ва айнан шунинг натижасида авиаҳалокатда омон қолганлар бор. Айнан шунинг натижасида фюзеляжнинг бир қисми ёнмади ва айнан шу туфайли бугун биз самолёт Россия томонидан уриб туширилганини аниқ айта оламиз».
«Биз Россия томонига ўз талабларимизни очиқ баён қилдик», — деди президент. «Улар нимадан иборат эди? Биринчидан, Россия томони Озарбайжондан кечирим сўраши керак. Иккинчидан, ўз айбини тан олиши керак. Учинчидан, айбдорлар жазоланиши, жиноий жавобгарликка тортилиши ва Озарбайжон давлати, жабрланган йўловчилар ва экипаж аъзоларига компенсация тўланиши керак. Бу бизнинг шартларимиздир».
«Биринчиси кеча бажариб бўлинди», — деди у Россия президенти Владимир Путиннинг «Россия ҳаво ҳудудида фожиали воқеа содир бўлгани учун» узр сўраганини таъкидлаб. — Умид қиламанки, бошқа шартларимиз ҳам қабул қилинади. Бу шартларнинг ҳаммаси ўринли. Бу ерда ҳеч қандай фавқулодда талаблар ёки саволлар йўқ, бу халқаро тажриба ва инсоний тамойилларга асосланган".
