Ўзбекистонда кичик қувватли атом электр станцияси қурилиши (КҚАЭС) лойиҳаси жараёнида Тошкент ва Жиззах вилоятларида жамоатчилик эшитуви ўтказилади. Бу ҳақда Ўзатом агентлиги Атом электр станциясини қуриш дирекцияси директори Отабек Аманов YouTube`даги Vatandosh интеллектуал клубидаги чиқишида айтиб ўтди.
Унинг таъкидлашича, мамлакатда АЭС ва тадқиқот реакторларини қуриш бўйича Ўзбекистон ва Россия ҳукуматлари битим имзолаган давр — 2017 йилда агентлик ижтимоий фикр сўровномасини ўтказган. Дирекция раҳбари ўшанда аксарият респондентлар лойиҳани қўллаб-қувватлаганига ишонтирди.
«2017 йилда биз ижтимоий фикр сўровномасини ўтказдик. 2000 нафар респондент Тошкентда, 1500 нафар респондент [фикри] Жиззах ва Фориш туманида ўрганилди. Тошкентда 55−60 фоиз, вилоятда кўпроқ 75−77 фоиз одам лойиҳани қўллаб-қувватлади», — деди у.
АЭС қуриш дирекцияси директорининг сўзларига кўра, ҳозир лойиҳанинг атроф-муҳитга таъсир ҳисоботи ишлаб чиқилмоқда.
«Ҳозир бизда атроф-муҳитга таъсир ҳисоботи ишлаб чиқиляпти. Бу ҳам шаффофлик дейман. Буни экспертизадан ўтказишдан олдин Тошкент ва Жиззах, керак бўлса, қўшни давлатда жамоатчилик эшитувини ўтказишимиз керак. Жамоатчилик эшитуви ўтгандан кейин биз экспертизага боришимиз керак, улар бизни шу натижа бўйича қабул қилади. Бу режалаштирилган», — дея таъкидлади Отабек Аманов.
Унинг айтишича, Жиззах вилоятининг энг катта тумани бўлган Фориш аграр ўлка, лекин унинг бор-йўғи 10 фоиз қисми сув билан таъминланган. Ўша туманда катта лойиҳа қурилса, ривожланиш кетади. Бу Жиззах учун драйвер бўлади, деди у.
Жами объектлар билан лойиҳада 30 минг киши ишлайди. 10 йилнинг ичида бу анча соҳаларни, ижтимоий соҳани ҳам ривожлантиради, дея ишонтирди Отабек Аманов.
