ҲАМАС Исроил билан ўт очишни тўхтатиш юзасидан эҳтимолий келишув доирасида озод қилинадиган 34 кишининг рўйхатини маъқуллади, дея хабар берди Reuters ҳаракат вакилига таяниб.
Агентлик суҳбатдошининг таъкидлашича, гаровга олинганларни қайтариш бўйича ҳар қандай келишув Исроил қўшинларини Ғазо ҳудудидан олиб чиқиш бўйича келишувга эришишга, шунингдек, вақтинчалик эмас, доимий ўт очишни тўхтатиш режимига боғлиқ бўлади.
Исроил бош вазири Биньямин Нетаньяҳунинг идораси ҲАМАСдан гаровга олинганлар рўйхатини олганини тасдиқлаганича йўқ. Reuters рўйхатнинг нусхаси борлиги, аммо унда кўрсатилган исмлар ошкор қилинмаганини таъкидлади.
The Times of Israel нашрининг аниқлик киритишича, Исроил ҲАМАСга 34 нафар гаровга олинганлар рўйхатини бир неча ой олдин тақдим этган. Гуруҳ рўйхатдагиларнинг қайси бири тирик эканини аниқлаш учун бир ҳафталик сулҳ талаб қилди. Исроил ҳукумати якуний келишув тузилмагунча ҳарбий ҳаракатларни тўхтатишдан бош тортиши мумкин, деб ёзади нашр.
Газетанинг ёзишича, 2023 йил 7 октябрдаги ҳужум пайтида ҲАМАС гаровга олган 251 кишининг 96 нафари Ғазо секторида қолмоқда. Исроил ҳарбийлари уларнинг учдан бир қисми ўлган деб тахмин қилмоқда.
Reuters хабарига кўра, Исроил вакиллари Қатар ва Миср воситачилигида ҲАМАС билан музокараларни қайта тиклаш учун ўтган жума куни Доҳада бўлган. Афтидан, томонлар 20 январга қадар, яъни АҚШнинг сайланган президенти Дональд Трамп лавозимга киргунга қадар келишувга эришмоқчи.
Нетаньяҳу аввалроқ Ғазодаги уруш Исроил ҲАМАС устидан тўлиқ ғалабага эришиб, гуруҳнинг ҳарбий ва сиёсий салоҳиятини йўқ қилганидан кейингина тугашини бир неча бор таъкидлаган.
