Ижтимоий тармоқларда ёш қизалоқ энага айби билан жиддий жароҳат олгани ҳақида маълумот тарқалди. Болалар омбудсмани идораси ҳолатни ўрганиб, назоратга олган.
Аниқланишича, Фарғонада яшовчи фуқаро Г. М. (1988 йилда туғилган) 2024 йил август ойида вояга етмаган қизи Г. И. (2022 йилда туғилган)ни юридик расмийлаштирилган ишончнома асосида фуқаро М. Х. (1988 йилда туғилган) васийлигига топшириб, ишлаш учун Россияга кетган.
Болалар омбудсмани идорасининг таъкидлашича, она М.Х.га мунтазам равишда унинг хизматлари ва боланинг кундалик харажатлари учун пул жўнатган.
15 ноябрь куни икки ёшли қизалоқ уй зинасидан йиқилиб, оғир жароҳат олган. Xабарга кўра, энага ўз васийлигидаги қизалоқни касалхонага олиб бормаган, бу унинг соғлиғига хавф туғдирган.
Kun.uz`нинг ёзишича, қизнинг онаси энагадан болаларини унга Telegram орқали кўрсатишни сўраган. Аёл болаларни кўрганда, қизалоқ оғир тан жароҳати олган, олти ёшли акаси эса уларга нисбатан доимий шафқатсиз муносабатда бўлинганини айтган.
Қизда, хусусан, бош мия жароҳати ва ҳаёт учун хавфли бўлган бошқа жиддий жароҳатлар аниқланган.
Республика шошилинч тиббий ёрдам илмий маркази Фарғона филиали шифокори Ғайратжон Ҳотамовнинг айтишича, бола оғир аҳволда, ярим ҳушсиз ҳолатда бўлган. Қизнинг бош қисмида каттагина шиш бўлган, пешона суяги синган. Уни болалар реанимацияси бўлимига жойлаштиришган.
«Қизалоқнинг бошидан ярим литрга яқин йиғилиб қолган эски қонни олиб ташладик. Боланинг бош ва тана қисмларида жароҳат аломатлари бор эди» — деди шифокор.
Шифокорнинг сўзларига кўра, даволанишдан сўнг қизнинг аҳволи яхшилана бошлаган.
1 декабрь куни М.Х.га нисбатан Жиноят кодексининг 117-моддаси 1-қисми (Хавф остида қолдириш) билан жиноят иши қўзғатилиб, ҳозирда тергов ҳаракатлари олиб борилмоқда.
Кейинчалик Болалар омбудсмани идорасидан «Газета.uz»га маълум қилинишича, 5 январь куни энага М. Х. қўлга олиниб, унга қўшимча равишда Жиноят кодексининг 104-модданинг 2-қисми «б» ва «в» бандлари (Ўз хизмат ёки фуқаролик бурчини бажариши муносабати билан шахсга ёки унинг яқин қариндошларига нисбатан; ўта шафқацизлик билан қасддан баданга оғир шикаст етказиш) бўйича айблов эълон қилинган.
