Сеул округ суди импичмент эълон қилингани учун вақтинча ҳокимиятдан четлатилган президент Юн Сок Ёлни ҳибсга олиш ордерини узайтирди, деб хабар бермоқда Yonhap.
Юқори мартабали мансабдор шахслар ўртасидаги коррупцияни тергов қилиш бошқармаси (CIO) ордерни узайтиришни сўраган.
CIO терговчилари 3 январь куни президент қароргоҳида Юн Сок Ёлни ушлашга уринган, аммо қўриқчилар киришни тўсиб қўйганидан кейин ҳаракат муваффақиятсизликка учраган.
CIO раҳбари О Дон Ун сешанба куни Юнни ҳибсга олишга муваффақиятсиз уриниши учун узр сўради ва иккинчи уринишда буйруқни бажаришга ваъда берди. Унинг сўзларига кўра, CIO иккинчи ордерни ижро этишга «пухта тайёргарлик кўради», чунки бу «сўнгги имконият» бўлиши мумкин. Шунингдек, у президентни танқид қилиб, фармонни бажармаслик қонун устуворлигига путур етказишини таъкидлади.
CIO декабрь ойи бошида мамлакатда ҳарбий ҳолат эълон қилгани учун Юнга қарши исён ва ҳокимиятни суиистеъмол қилиш ишини тергов қилмоқда. Бошқарма ҳибсга олиш ордерини Юн терговга келиш ҳақидаги учта чақирув қоғозини эътиборсиз қолдирганидан кейин сўраган. 31 декабрь куни Сеул округ суди — мамлакат тарихида биринчи марта амалдаги президентни ҳибсга олиш учун ордер берди. CIO, шунингдек, президент қароргоҳини тинтув қилиш учун ордер олди. Ҳибсга олиш учун буйруқ 6 январгача амал қиларди.
Юнни ҳибсга олиш муваффақиятсиз кечганидан сўнг унинг адвокатлари CIO`да исён айбловларини текшириш ваколати йўқлигини таъкидлади ва ҳибсга олиш ҳамда тинтув ордерларини ноқонуний ва ҳақиқий эмас деб атади.
Президент қароргоҳи Сеулнинг корейсча Беверли-Ҳиллз деб номланувчи нуфузли Ҳаннам-дон туманида жойлашган, деб ёзади Reuters. Юн Сок Ёль у ерда рафиқаси Ким Кён Хи, олтита ит ва бешта мушуги билан яшайди.
- Президент Юн Сок Ёль 3 декабрь куни кечқурун Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлаган. Унинг сўзларига кўра, бундай чорани мухолифат ҳаракатлари туфайли қўллаган.
- Бир неча соатдан сўнг парламент президент қарорини блоклади ва Юн уни бекор қилишга мажбур бўлди. Кейинги бир неча кун ичида Жанубий Корея Мудофаа вазирлиги раҳбари Ким Ён Хён истеъфога чиқди ва президент, собиқ вазир ва бошқа бир қатор мансабдор шахсларга нисбатан тергов бошланди. Улар исён, давлатга хиёнат ва ўз ваколатларини суиистеъмол қилишда гумонланмоқда.
- 14 декабрь куни Жанубий Корея парламенти иккинчи уринишда Юнга импичментни қўллаб-қувватлади. Унинг президентлик ваколати тўхтатилди. Иш кўриб чиқиш учун Конституциявий судга юборилди, у президентни лавозимидан четлатиш ёки лавозимга тиклаш тўғрисида қарор қабул қилиши керак.
