Тошкент вилояти Қибрай туманида дорилар рецептини электрон ёзиш ва бериш тизими синов тариқасида ишга туширилди, дея хабар бермоқда Spot.
Тизим Uzinfocom ягона интегратори томонидан ишлаб чиқилган DMED платформаси орқали ишлайди. Тест синовлари туман марказий кўп тармоқли поликлиникаси ҳамда 8 та дорихона тармоғини қамраб олган.
Рецепт олиш учун сиз смартфонингизга DMED иловасини ўрнатишингиз керак (Android ва iOS учун). Электрон рецепт беморга шифокорга мурожаат қилганида, унинг телефонга юборилган кодни киритганидан сўнг берилади.
Бемор чиқарилган рецепт билан дорихонага боради ва уни фармацевтга кўрсатади. Фармацевт рецептдаги QR-кодни сканерлаш орқали унга керакли дориларни топширади.
Тизим ишлаб чиқарувчиларининг таъкидлашича, бу дорихоналарга дориларнинг тарқатилиши ҳақидаги аниқ маълумотларни реал вақтда олиш имконини яратади. Шунингдек, автоматлаштирилган патентсиз номлар бўйича препаратларни танлаш усули рецептларни тузишдаги хатоларни олдини олишга ёрдам беради.
Шавкат Мирзиеёв 2024 йилнинг 5 февралида бўлиб ўтган йиғилишда соғлиқни сақлаш соҳасини рақамлаштириш, эскирган протоколлар ва даволаш стандартлари билан боғлиқ муаммолар ҳақида гапираркан, кафолатланган пакетга кирган дориларни электрон рецепт асосида беришни йўлга қўйишни топширганди.
Июль ойида соғлиқни сақлаш вазири Асилбек Худаяров 2024 йил охиригача Тошкент шаҳрида дори воситаларига электрон рецептлар жорий этиш режаларини маълум қилганди. Унинг сўзларига кўра, бу тизим рақобат муҳитини яратиб, шифокорларнинг «жуда кўп кераксиз дори-дармонлар»ни ёзиб беришининг, шунингдек, контрабанда маҳсулотлари сотилишининг олдини олади.
