Дания қироли Фредерик Х мамлакат гербини ўзгартириб, унда Гренландия ва Фарер оролларининг рамзлари — оқ айиқ ва қўчқорни янада каттароқ қилиб кўрсатди, деб ёзмоқда The Guardian ва The Independent.
Қироллик веб сайтида айтилишича, ўзгартиришлар 20 декабрдаги қарор билан қиролнинг «ҳамдўстликни акс эттирадиган ва тарих ҳамда гералдик анъаналарни ҳисобга оладиган замонавий герб яратиш» истаги туфайли киритилган.
1972 йилда қабул қилинган олдинги версияда Гренландия ва Фарер ороллари рамзлари гербнинг тўртта майдонидан бирига жойлаштирилган. Энди улар каттароқ ҳолатда алоҳида майдонларга жойланди. Қолган икки майдондан Дания ва Жанубий Ютландия минтақасининг герби жой олган (иккаласиникида ҳам ҳаворанг шерлар тасвири бор).
Шунингдек, Гренландия ва Фарер ороллари рамзлари билан бир майдонда бўлган ва 1397−1523 йиллар оралиғида тузилган Дания, Норвегия ҳамда Швециянинг Кальмар иттифоқини ифодаловчи учта тож гербдан олиб ташланган. Қироллик баёнотида айтилишича, бу элемент «энди долзарб эмас».
The Guardian нашрининг таъкидлашича, герб ўзгариши Гренландия ва унинг Дания билан муносабатлари атрофида кескинлик кучайган даврда содир бўлди. Бу, шунингдек, АҚШнинг сайланган президенти Дональд Трампнинг декабрь ойида оролга «эгалик ва назорат қилиш» АҚШ учун «мутлақ зарурат» эканини айтган сўзларидан кейин юз берди. Трамп Гренландияни сотиб олиш режалари ҳақида ўзининг биринчи муддати давомида ҳам гапирганди, аммо рад жавобини олган. Бу сафар бош вазир Муте Эгеде яна «Гренландия сотилмайди» деб жавоб берди, деб ёзади BBC.
Гренландия дунёдаги энг катта орол бўлиб, Данияга қарашли. Унинг аҳолиси 56,8 минг кишини ташкил этади.
