Олий Мажлис Қонунчилик палатаси спикери ўрибосари Раҳим Ҳакимов 7 январь куни палатанинг барча органлари бу йилги фаолиятида президент ташаббусларини биринчи галдаги вазифаси сифатида белгилаб, уларни оғишмай амалга ошириши лозимлигини таъкидлади.
Раҳим Ҳакимов бу гапларни шу куни бўлиб ўтган Қонунчилик палатаси мажлисига раислик қилиб, ўзининг кириш сўзида айтиб ўтди. Спикер Нуриддин Исмоилов мажлисда иштирок этмади.
«Ўтган ҳафтада халқимиз янги йилни хурсандчилик билан кутиб олди. Мамлакатимиз президентининг байрам муносабати билан Ўзбекистон халқига янги йил табригини оммавий ахборот воситалари орқали тингладик. Давлатимиз раҳбари халқимизнинг фидокорона меҳнати, сиёсий, ижтимоий фаоллиги билан Янги Ўзбекистон ғояси реал воқеликка айланаётганини алоҳида қайд этдилар», — деди Раҳим Ҳакимов нутқи аввалида.
Спикер ўрибосари президент табриги парламент аъзоларига ҳам янгича шижоат бағишлаб, уларни янги марралар сари ундаганини таъкидлашаётганини айтди.
«Олий Мажлис ва маҳаллий кенгашларга бўлиб ўтган сайловлар демократик ислоҳотларнинг янги даврига қадам қўйганимизни яна бир марта тасдиқлаганини айтиб ўтдилар. Депутатлар корпуси президентимиз табриги барча юртдошларимиз каби парламент аъзоларига ҳам янгича шижоат бағишлаб, уларни янги марралар сари ундаганини таъкидлашмоқда. Айтиш керакки, президентимиз табригида мамлакатимиз келажаги учун муҳим йўналишлар ҳам аниқ баён қилинди», — деди у.
Раҳим Ҳакимов, шунингдек, депутатлар бюджет ижросини назорат қилишга алоҳида эътибор қаратиши кераклигини таъкидлади.
«Янгиланган Конституцияга мувофиқ, давлат бюджетининг ижро этилиши устидан назоратни амалга ошириш Қонунчилик палатасининг мутлақ ваколати саналади. Шундан келиб чиқиб, аввало қонуннинг мазмун-моҳиятини кенг жамоатчиликка етказишимиз, ҳамда бюджет ижросини назорат қилишга алоҳида эътибор қаратишимиз керак бўлади. Қўмиталар ўз фаолият йўналишларидан келиб чиқиб, тегишли вазирлик ва идораларнинг ахборотларини эшитиб боришлари, жойларда назорат-таҳлил тадбирларини кучайтиришлари лозим. Фракциялар ўз партиялари сайловолди дастурларидан келиб чиқиб, давлат бюджети ижроси билан боғлиқ масалаларни парламент минбарига олиб чиқиш бўйича ташаббус кўрсатишлари мақсадга мувофиқ бўлади», — деди спикер ўрибосари.
У мазкур мажлис 2025 йил ҳисобидан Қонунчилик палатасининг биринчи мажлиси эканлиги қайд этиб, ўтган ҳафтада сиёсий партиялар фракциялари ва қўмиталар мажлислари ўтказилиб, жорий йилдаги устувор вазифалари, иш режалари белгилаб олинганини таъкидлади.
Қайд этилишича, мажлисларда мамлакат президентининг 2024 йил 18 ноябрь куни Олий Мажлис Қонунчилик палатасининг биринчи мажлисидаги, шунингдек, палатанинг 20 ноябрдаги мажлисида сўзлаган нутқларида илгари сурилган ғоялар, таклифлар ва ташаббусларни ҳаётга тадбиқ этишга яна бир бор эътибор қаратилган.
«Биласизлар, мамлакатимиз президентининг Олий Мажлис палаталарининг ўтган йил 18−20 ноябрида бўлиб ўтган мажлислардаги нутқларида белгиланган устувор вазифаларни амалга ошириш бўйича Қонунчилик палатасининг ҳаракатлар дастури ҳам тасдиқланган. Албатта, Қонунчилик палатасининг барча органлари бу йилги фаолиятларида президентимиз ташаббусларини биринчи галдаги вазифалари сифатида белгилаб, уларни оғишмай амалга оширишлари лозим бўлади. Бу эса депутатлар корпусидан катта масъулият билан ишлашни, сайловчилар манфаатларини таъминлаш борасида янада ташаббускор бўлишни талаб этади», — деди у.
Шундан сўнг Олий Мажлис Қонунчилик палатаси кенгашининг навбатдаги йиғилиши бошланган. Унда кенгаш аъзолари томонидан Қонунчилик палатаси фаолиятига оид қатор масалалар муҳокама қилинган. Мажлис кун тартибидан ўрин олган ўнга яқин, жумладан, ер участкаларидан фойдаланиш тартиби янада такомиллаштириш, суд ҳужжатлари ва бошқа органлар ҳужжатларини ижро этиш тизимини такомиллаштириш, электрон сигареталарнинг муомаласини тақиқлаш, қишлоқ хўжалиги таваккалчиликларини суғурта қилишга қаратилган масалалар атрофлича кўриб чиқилган.
