АҚШ Сенати ва Вакиллар палатаси аъзолари 6 январь куни бўлиб ўтган махсус йиғилишда республикачилардан номзод Дональд Трампнинг президентлик сайловларида ғалаба қозонганини тасдиқлади, деб хабар бермоқда The Guardian.
Трампнинг ғалабаси президентлик сайловларидаги рақиби, амалдаги вице-президент Камала Ҳаррис томонидан эълон қилинди. АҚШ Конституциясига кўра, амалдаги вице-президент сайловчиларнинг овозларини сертификатлаш учун Конгресснинг икки палатаси қўшма мажлисининг расмий раиси бўлиши керак.
https://twitter.com/SkyNews/status/1876338826186047639
Трамп сайловчиларнинг 312 та овозини олди. Ҳаррис бу ҳақда эълон қилгандан сўнг республикачилар унинг нутқини қарсаклар ва қичқириқлар билан бўлди. Бир неча сониядан сўнг Ҳаррис сайловчиларнинг 226 та овозини олганини айтди, шундан сўнг демократлар қарсак чалишни бошлади.
«Аминманки, Америка демократияси бизнинг ҳар бир инсон учун курашишга тайёрлигимиз, уларнинг бизнинг демократиямиз учун курашишга тайёрлиги ва унинг аҳамиятини ҳурмат қилиш даражасида кучли. Акс ҳолда, у жуда мўрт ва инқирозли дақиқаларга бардош бера олмайди. Бугун эса Америка демократияси оёқда турибди», — деди Капитолийдаги журналистларга берган қисқа нутқида Ҳаррис. У президентлик сайловларида Трампга мағлубиятга учраганини тасдиқлашда раислик қилиш билан шунчаки ўзининг конституциявий бурчини бажараётганини қўшимча қилди.
Одатда, овозларни сертификатлаш жараёни шунчаки расмиятчилик саналади, аммо тўрт йил олдин Вашингтонда (Колумбия округи) содир бўлган воқеалар туфайли бу йил хавфсизлик чоралари кучайтирилди, деб ёзади BBC рус хизмати. Истеъфога чиқаётган президент Жо Байден 2021 йил 6 январдаги воқеалар такрорланишига йўл қўймасликка ваъда берган.
Тўрт йил аввал — 2021 йил 6 январда президентлик сайловлари якунлари ва Жо Байденнинг ғалабасини тасдиқлаши керак бўлган Конгресс йиғилиши Дональд Трамп тарафдорларининг Капитолийга бостириб кириши туфайли бир неча соатга тўхтатилган.
Трампнинг инаугурацияси 20 январь куни бўлиб ўтади.
