Тошкентнинг Яккасарой тумани ҳокимлиги 2024 йилнинг 14 сентябрь куни Шота Руставели ва Бобур кўчалари кесишмасидаги Пушкин хиёбонини реконструкция қилиш лойиҳаси тақдимотини ўтказган эди. Бу ерда сувли зоналар ва аттракционлар сонини кўпайтириш, соябон (навес) ўрнатиш, ҳожатхонани реконструкция қилиш ва кам ҳаракатланувчи (мобиллиги чекланган) ташриф буюрувчилар учун қулай шароит яратиш мақсадида майдон сатҳини бир хилда текислаштириш режалаштирилган эди. Лойиҳа Шота Руставели кўчаси бўйлаб марказга чўзилган гастрономик кўчанинг бир қисми бўлиши кутиляпти. Лойиҳачи ва пудратчи сифатида Dizayn fabrikasi ва KOÇ Construction mekanik elektrik компаниялари танланган.
Пушкин хиёбонини реконструкция қилиш лойиҳаси.
Қурилиш ишлари бошланиб, хиёбон ҳудуди баланд тўсиқ билан ўраб олингандан сўнг, Яккасарой тумани аҳолиси шубҳага туша бошлаганди. Хусусан, кўздан пана қилинган қурилиш майдонида дов-дарахт йўқ қилинаётган бўлиши мумкинлиги борасида хавотирлар бор.
«Газета.uz» мухбири Дилявер Аблякимов реконструкция ишларининг бориши билан танишди.
Йўлаклар йўналиши.
Пудратчи ташкилот — Туркиянинг KOÇ Construction қурилиш компанияси вакили Баҳри Сака сентябрдаги тақдимотда ёдгорлик, асосий фаввора ва 2,5 гектар майдондаги барча дарахтлар ўз ўрнида қолишини таъкидлаган эди. Яккасарой тумани ҳокими Нилуфар Аллабергенова ҳам майдондаги дарахтларнинг сақлаб қолинишини маълум қилган. Асосий фаввора ва ёдгорлик ҳозирча бутун ва уларга зарар етмаган.
KOÇ Construction вакилининг сўзларига кўра, қурилиш жараёнида бирорта ҳам дарахт кесилмаган. Аксинча, реконструкция ишлари якунлангач, майдонга яна 50 га яқин янги кўчатлар ўтқазилади. Шунга қарамай, «Газета.uz» мухбирининг кузатувларига кўра, махсус техникалар иш олиб бориши натижасида баъзи дарахтларга қисман зарар етган.
Ишчиларнинг қайд этишларича, хиёбонда суғориш тизими янгиланмоқда, пиёдалар йўлакларига брусчатка ётқизилмоқда. Асосий фавворадан ёдгорликкача сув канали ўтказилади.
Канал ўзани.
Йўлаклар қолипи.
Аҳоли хиёбондаги ёш ниҳолларнинг йўқ қилинишидан хавотирда эди.
Пушкиннинг «Руслан ва Людмила» достонидаги олим мушукнинг ҳайкали вақтинча олиб ташланган. KOÇ Construction ишчисининг сўзларига кўра, у қурилиш ишлари тугагандан сўнг қайта ўрнатилади. Майдоннинг очилиши 2025 йил март ойида бўлиши кутилмоқда, дейди мутахассис.
Реконструкция режаси
«Пушкин хиёбони 24/7 тартибида ишлайдиган сайёҳлик кўчасининг бошланиши — асосий маркази бўлади. Шота Руставели кўчасининг гастрономик қисмидаги хизмат кўрсатиш объектлари кеча-ю кундуз ишлайди. Бу ерда 1,6 км узунликдаги велойўлак, 40 та замонавий скамейка ва 10 та жойда, хусусан, ерости ўтиш жойларида ҳам пандуслар бўлади (ерости ўтиш жойлари ҳам реконструкция қилинади). 1,5 км масофада яшил майдон барпо этилади, 6 та автобус бекати тўлиқ реконструкция қилинади. Ҳожатхоналар ва Wi-fi зоналари ҳам ташкил этилади», — деганди Яккасарой тумани ҳокими Нилуфар Аллабергенова 2024 йил сентябридаги тақдимотда.
