Ўзбекистон АҚШ билан стратегик шерикликни чуқурлаштиришни режалаштирмоқда. Бу ҳақда жамоатчилик муҳокамасига қўйилган 2025 йилга мўлжалланган давлат дастури лойиҳасида айтилади.
Ташқи ишлар вазирлигига йил якунига қадар АҚШ янги маъмурияти вакиллари билан яқин ҳамкорлик ўрнатиш ва олий даражадаги ташрифни ташкил этиш вазифаси юклатилмоқда.
Бундан ташқари, Тошкентда АҚШ билан кенгайтирилган стратегик шериклик мулоқотининг биринчи раундини юқори даражада ўтказиш таклиф этилмоқда.
Шунингдек, «C5+1» (Марказий Осиё ва АҚШ) форматидаги ҳамкорликни фаоллаштириш, жумладан, вазирлар учрашуви, тегишли «ишчи гуруҳлар» йиғилишларини ўтказиш, шунингдек, ушбу форматнинг 10 йиллиги муносабати билан Самарқандда ўтказиладиган юбилей саммитига тайёргарлик кўриш режа қилинмоқда.
Лойиҳада парламентлараро алоқаларни кенгайтириш, хусусан, АҚШ Конгресси етакчи аъзоларининг Ўзбекистонга ташрифларини ташкил этиш кўзда тутилган.
Ўзбекистон АҚШ билан хавфсизлик соҳасидаги ҳамкорликни кенгайтиришни кўриб чиқмоқда, шунингдек, АҚШ ҳукумати томонидан инсон ҳуқуқлари мезонлари бўйича эълон қилинадиган турли ҳисоботларда Ўзбекистоннинг юқори позицияларини сақлаб қолиш учун яқин ҳамкорликни давом эттириш ниятида.
Бундан ташқари, таълим, фан, соғлиқни сақлаш, атроф-муҳитни муҳофаза қилиш ва бошқа соҳаларда, жумладан, университетлар ўртасидаги ҳамкорлик, инглиз тилини ўқитиш, шунингдек, фан ва экология соҳаларида қўшма лойиҳаларни амалга ошириш бўйича АҚШ билан алоқаларни кенгайтириш режалаштирилмоқда.
