7 январда бошланган шиддатли ўрмон ёнғинлари Лос-Анжелесни ўраб олди, камида 5 киши ҳалок бўлди, юзлаб уйларга шикаст етди, ўт ўчириш ресурслари ҳамда сув таъминотида муаммолар бор, 130 000 дан ортиқ одамни эвакуация қилиш буюрилган. Бу ҳақда Reuters ва CNN ёзмоқда.
Турар жой бинолари ёниб кетди, ўчириш ишларига авиация жалб қилинди. Ўт ўчирувчилар ишини кучли шамол мураккаблаштирмоқда — Миллий метеорология хизмати 9 январга қадар Лос-Анжелес округининг катта қисмида секундига 36 метргача шамол бўлиши кутилаётганини маълум қилди.
Округда олтита ўрмон ёнғини кузатилмоқда. Малибу ва Санта Моника ўртасидаги денгизбўйи ҳудудида Палисейдс ёнғини камида 1000 та иншоотни вайрон қилди ва бу Лос-Анжелес округидаги энг вайронкор ёнғинлардан бирига айланиб улгурди. У ерда кўплаб машҳурлар, жумладан, АҚШ вице-президенти Камала Ҳарриснинг уйи жойлашган. Калифорния ҳукумати фавқулодда ҳолат эълон қилган.
https://twitter.com/RealJamesWoods/status/1876861021102461373?ref_src=twsrc%5Etfw%7Ctwcamp%5Etweetembed%7Ctwterm%5E1876861021102461373%7Ctwgr%5E%7Ctwcon%5Es1_c10&ref_url=
AccuWeather прогнозларига кўра, дастлабки зарар ва иқтисодий йўқотишлар 50 миллиард доллардан ортиқ деб баҳоланмоқда. PowerOutage.us маълумотларига кўра, Лос-Анжелес округида 1 миллионга яқин уй ва корхоналар электр таъминотидан маҳрум бўлган. Округ бўйлаб мактаблар ёпилган.
Президент Байден Калифорнияда ўрмон ёнғинлари туфайли офат режимини жорий этди. Шунингдек, у Италияга сафарини бекор қилди.
