Тошкентдаги меҳмонхонада россиялик журналист Инесса Паперная ва унинг ҳамроҳи, шунингдек, бир ўзбекистонлик фуқаронинг вафоти бўйича жиноят иши доирасида тўрт нафар гумонланувчи қамоққа олинди. Уларга нисбатан қамоққа олиш тарзидаги эҳтиёт чораси қўлланилгани ҳақида Ўзбекистон Бош прокуратураси матбуот котиби Ҳаёт Шамсутдинов «Газета.uz»га маълум қилди.
У ушбу иш бўйича тергов ҳаракатлари давом этаётганини таъкидлади.
Аввалроқ Kun.uz ҳибсга олинганлар — Karaman Palace Hotel меҳмонхонаси эгаси, икки нафар иситиш қозони сотувчиси ва уни ўрнатган сантехник экани ҳақида хабар берди. Мутахассислар қозонни эскирган деб топишган бўлиб, у хавфсизлик қоидалари бузилган ҳолда ўрнатилган.
Нашр манбасининг маълум қилишича, меҳмонхона эгаси А. Хўжақулов, сотувчилар З. Жамолдинов ва А. Юсупов, шунингдек, сантехник Н. Қурбонов Ўзбекистон Жиноят кодексининг 186-моддаси 4-қисми «а» банди (Хавфсизлик талабларига жавоб бермайдиган хизматлар кўрсатиш одам ўлимига сабаб бўлса) бўйича айбланмоқда.
Тергов ҳужжатларида кўрсатилишича, сотувчилар З.Жамолдинов ва А.Юсупов Karaman Palace Hotel меҳмонхонаси эгасига эски ва техник носоз иситиш қозонини сотган. Сантехник Н. Қурбонов билан биргаликда улар жиддий носозликларга эга бўлган ускуналарни ўрнатганлар: қозоннинг конструкцияси ўзгартирилган, конденсатни чиқариб юбориш тизими тўғридан-тўғри канализацияга сифонсиз уланган, тутун ўтказгичлар эса техник ва меъёрий талаблар бузилган ҳолда ўрнатилган.
Суд-тиббий экспертизаси Россия фуқаролари Инесса Паперная (47 ёш) ва Максим Радченко (45 ёш) ҳамда Ўзбекистон фуқароси Хушнуд Удековнинг (48 ёш) ўлимига ис газидан ва водород сульфидидан ўткир заҳарланиш сабаб бўлганини тасдиқлади.
Республика комплекс техник экспертизаси хулосасида таъкидланишича, сифонсиз канализацияга уланган эскирган ва носоз иситиш қозонларидан фойдаланиш газ сизиб чиқиши ва заҳарланиш хавфини оширади. Бундан ташқари, ускуналар шамоллатиш ва кондиционерлаш талаблари бузилган ҳолда ўрнатилган.
