«Газета.uz» журналисти ва режиссёр Сабина Бакаева 13−23 февраль кунлари Германия пойтахтида бўлиб ўтадиган 75-Берлин халқаро кинофестивалида ўзининг дебют ҳужжатли фильми «Ойдин» («Нагота»)ни тақдим этади. Қисқа метражли фильм Berlinale Forum Special бўлимида намойиш этилади.
Муаллифнинг сўзларига кўра, уни «Ойдин»нинг Берлинда бўлиб ўтадиган жаҳон премьерасида кутишмоқда, аммо шахсий иштирок виза олинишига боғлиқ.
«Виза олиш учун вақтим жуда кам. Фестиваль февраль ойининг ўрталарида бошланишига қарамай, 27 январдан 12 февралгача хорижда бўламан. Умид қиламанки, Берлинга ҳам борамиз», — дейди Сабина Бакаева.
«Ойдин» — Ўзбекистонда суратга олиниб, Берлинале дастурига киритилган учинчи фильм. 2014 йилги фестивалда Саодат Исмоилованинг «40 кунлик сукунат» фильми премьераси бўлиб ўтган бўлса, 2000 йилда Берлинда Юсуф Розиқовнинг «Нотиқ» фильми намойиш этилган.
Фильмдан кадр.
Сабина Бакаева фильмининг сюжети она ва қизнинг вақт контекстида аёл шахсиятининг шаклланиши ва ўзига бўлган муносабати, шунингдек, ақидалар, анъаналар ва шахсий тажрибанинг унга таъсири ҳақидаги самимий суҳбатига асосланади. «Ойдин» фильмининг қаҳрамонлари режиссёрнинг ўзи ва унинг 66 ёшли онаси бўлиб, онаси сон-саноқсиз тақиқлар занжирини синдиришга ва ўз ҳаётини шахсий қарашларига мувофиқ қуришга эришган.
«Мен онамнинг руҳияти ҳақида фильм суратга олмоқчи эдим, аммо фильмдаги мавзулар менга ҳам, ҳозирги Ўзбекистондаги кўплаб аёлларга ҳам тегишли эканини тушундим. Фильмга киритилган жуда шахсий суҳбатларга қарамай, суратга олишга ва Тошкентда ёпиқ намойиш ўтказишга рози бўлгани учун онамдан ниҳоятда миннатдорман», — дейди Сабина Бакаева.
Фильмдан кадр.
«Ойдин» — Сабина Бакаеванинг режиссёрликдаги дебюти. 2023 йилда у Франциянинг Ateliers Varan кино мактаби ва Ўзбекистон ва Марказий Осиё киноижодкорлари учун мустақил таълим маркази бўлган Tashkent Film School қўшма маҳорат мактабида иштирок этган. Берлинале дастурига танланган картина таълим жараёнида суратга олинган. Журналист, шунингдек, сценарий муаллифи ва оператор сифатида ҳам ишлаган.
«Берлиналега киритилишимни омадимнинг чопиши деб биламан, чунки илгари қўлимга ҳеч қачон камера олмаганман. Фильм суратга олиш режиссёрнинг истеъдоди ва маҳорати учун фақат у томошабинлар учун ишлаётгандагина синов бўлади. Мен эса ўзим учунгина суратга олдим. Ўз терапиям учун, чунки акс ҳолда онам билан ўзи ҳақида гаплаша олмасдим», — дейди Сабина Бакаева.
Ҳужжатли фильмнинг жаҳон премьерасидан сўнг «Ойдин» 75-Берлин кинофестивалида Тошкентда ёпиқ намойиш этилади.
