Нью Йорк штати судьяси Хуан Мерчан АҚШнинг сайланган президенти Дональд Трампнинг порноактриса Сторми Дэниелсга сукут сақлагани учун 130 минг доллар тўлагани бўйича иш юзасидан қарор чиқарди ва унга ҳеч қандай шартларсиз озодликни тайинлади, деб ёзмоқда CNN.
Бу жазо Трампнинг судланганини англатади, аммо у қамоқ ёки жаримага дучор бўлмайди.
Трамп суд мажлисида иштирок этмади, суд унга ҳукмни видеоалоқа орқали тинглашга рухсат берди, бу пайтда Трамп ўз адвокати билан Флоридада эди. Суд қароридан сўнг Трамп унга нисбатан «жуда, жуда адолатсизлик» қилинганини айтди ва унга қарши ишни «жодугарларни овлаш» деб атади.
Бу Трампнинг ҳукмгача етиб келган ягона жиноий иши саналади. 2024 йил май ойида суд маслаҳатчилари Трампни мазкур айбловнинг барча 34 банди бўйича айбдор деб топган. Ҳукм чиқариш 2024 йил 11 июлга белгиланганди, бироқ бу бир неча марта қолдирилганди.
Трамп АҚШ Олий судининг собиқ президентлар расмий хатти-ҳаракатлари учун жиноий таъқибдан иммунитетга эга экани ҳақидаги 1 июлдаги қарорига асосланиб, бу иш бўйича айблов ҳукмини бекор қилиш ҳақида алоҳида илтимоснома киритган эди, аммо ютқазган.
Ноябрь ойида, Трамп сайланганидан сўнг, унга қарши иккита федерал иш — 2020 йилги сайловларга аралашиш ва махфий ҳужжатлар билан тегишлича муомала қилмаслик бўйича ишлар тўхтатилди. Бунга АҚШ Адлия вазирлигининг президентни судда таъқиб қилишни тақиқловчи сиёсати сабаб бўлди.
Жоржия штатида Трампга қарши 2020 йилги сайлов натижаларини бекор қилишга уриниш бўйича жиноий иш прокурор Фани Уиллис лавозимидан четлаштирилгани сабабли бир неча ойдан бери муаллақ турибди.
