Жанубий Корея Транспорт вазирлиги самолёт қўниши учун мўлжалланган радиомаёқли конструкцияларни мамлакатнинг барча аэропортларида алмаштириш режаларини эълон қилди. Бу Муан аэропортида учиш-қўниш йўлагидан чиқиб кетган Jeju Air компаниясининг Boeing 737−800 самолёти қулаганидан кейин содир бўлмоқда, деб ёзди Reuters.
Еттита аэропортда, жумладан, Муанда бетон ёки пўлатдан қурилган кўтармалар ёхуд пойдеворларни алмаштириш зарурати мавжуд, дейилади вазирлик баёнотида. Конструкцияларни алмаштириш 2025 йил охиригача якунланиши режалаштирилмоқда.
Авиация хавфсизлиги бўйича мутахассислар бетон пойдеворга ўрнатилган радиомаёқли тупроқ кўтармасининг жойлаштирилишини кескин танқид қилди ва бу, эҳтимол, бортдаги 181 кишидан 179 нафари вафот этган қулашда қурбонлар сонини кўпайтиргани ҳақида фикр билдирди, деб таъкидлайди Reuters. Конструкция 2023 йилда Муан аэропортида қурилган.
Ҳукумат, шунингдек, Boeing 737−800 самолётида учган олтита авиакомпаниянинг хавфсизлигини текширишни якунлаб, баъзи операторларда қоидабузарликларни, жумладан, самолётдаги нуқсонларни бартараф этиш ёки йўловчиларни тушириш тартиб-қоидаларига риоя қилмаслик ҳолатларини аниқлади.
Транспорт вазирлиги Муан аэропортининг ёпилиши 19 январга қадар давом этишини алоҳида маълум қилди.
