Миллий банклараро процессинг маркази (Humo) устав капиталидаги 100 фоиз давлат акциялар пакетини хусусийлаштириш бўйича келишувга эришилди, дея хабар бермоқда Давлат активларини бошқариш агентлиги.
Қайд этилишича, пакетни сотиш бўйича бошланган очиқ савдо жараёнларининг мажбуриятга эга бўлган таклифлар (BO)ни тақдим этиш босқичида 6 нафар талабгор иштирок этиш учун таклиф қилинган. Жараёнга Deloitte халқаро компанияси консультант бўлган.
Белгиланган муддатларда консультантга жамиятни сотиб олиш бўйича 3 нафар талабгорлардан Мажбуриятга эга бўлган таклифлар (BO) келиб тушган ҳамда 65 млн доллар миқдоридаги энг юқори харид баҳосини таклиф қилган Paynet акциядорлик жамияти савдо ғолиби деб топилган.
Таъкидланишича, мазкур таклиф консультант томонидан ҳисобланган жамиятни сотиш мумкин бўлган индикатив нархлар оралиғида жойлашган ҳамда халқаро мустақил баҳоловчи KPMG томонидан баҳоланган қийматидан юқори.
Талабгор келгусида Humo тўлов тизимини барқарор ва узлуксиз ишлашини таъминлашга қаратилган қўшимча тадбирларни амалга ошириш бўйича мажбуриятларни, шунингдек, тизим фойдаланувчиларининг конфиденциал (шахсий ва банк) маълумотларини ҳимоя қилишни зиммасига олган.
Харидор ҳақида
Paynet — Ўзбекистон молиявий технологиялар соҳасида 18 йилдан буён фаолият юритаётган энг йирик тўлов операторларидан биридир. Мазкур тўлов тизими орқали 1500 дан зиёд маҳсулот етказиб берувчи ва хизмат кўрсатувчиларга тўлаш имконияти яратилган ҳамда йилига 20 миллиондан зиёд фойдаланувчилар ушбу хизматлардан фойдаланиб келмоқда. У 2005 йилда Ботир Арифжонов томонидан яратилган. Кейинчалик тадбиркор корхонани давлат вакили сифатидаги Халқ банкига сотиб, унинг бошқарувини тарк этган.
2022 йил август ойида Давактив Uzpaynet`нинг 100 фоиз улушини сотувга қўйганди. Кейинги бир ой ичида потенциал харидорлардан еттита ариза келиб тушди, бироқ таклифларни қабул қилиш «қўшимча аниқлаштиришлар» важи билан кейинга қолдирилди.
2022 йилнинг апрелида корхоналар ва ташкилотларнинг ягона давлат регистрига (КТЯДР) кўра, Давлат активларини бошқариш агентлиги (Давактив) балансидаги Paynet тўлов хизматининг 100 фоиз улуш New Industrial Technologies`га ўтказилган. Компания эгаси ўзгариши ҳақида ноябрь ойида маълумотлар пайдо бўлганига қарамай, Давактив улуш сотилгани бўйича расман хабар бермаган.
New Industrial Technologies МЧЖ 2019 йил апрель ойида давлат рўйхатидан ўтган бўлиб, 273,56 млрд сўм устав капиталига эга. Компаниянинг 60 фоиз улуши чет эл фуқароси ҳисобланган Алекс Лига тегишли (июнь ойида у ягона таъсисчи бўлган). 40 фоиз улуш Мустафа Абдураҳмоновга тегишли бўлиб, у айни вақтда Asia Alliance Bank`нинг мажоритар акциядори саналган Asia Alliance Group`нинг ҳам 77,6 фоиз улушига эгалик қилади.
Humo ҳақида
Миллий банклараро процессинг маркази 2018 йил сентябрь ойида президент қарори билан ташкил этилган. Ҳужжатда таъкидланганидек, чакана тўловларни қайта ишлаш бўйича давлат процессинг марказининг мавжуд эмаслиги миллий тўлов тизимининг хавфсизлик даражасини пасайтиради, тўлов инфратузилмасини ягона интеграциялашувига имкон бермайди ва битта монополия тизимининг ҳукмронлигига олиб келади.
Humo тўлов тизими ўша пайтдаги ягона процессинг маркази — хусусий тузилма бўлган Uzcard дастурий таъминотидаги катта носозликдан сўнг пайдо бўлган.
Компаниянинг устав капитали 155,4 млрд сўм. Айни пайтда 27 миллиондан ортиқ Humo карталари чиқарилган бўлиб, 210 мингдан ортиқ терминал ва 6,4 мингдан ортиқ банкоматлар ўрнатилган.
Президентнинг 30 ноябрдаги қарори билан Марказий банкнинг бош ахборот марказига тегишли бўлган Humo тўлов тизимидаги давлат улуши тўлиқ ДАБАга ўтказилган. «Газета.uz»га агентлиги матбуот хизмати тизимининг агентликка ўтказилиши хусусийлаштириш билан боғлиқ эмаслигини билдирганди. Марказий банк балансида банклараро процессинг марказининг мавжудлиги манфаатлар тўқнашувига олиб келиши мумкин, дейилганди агентлик хабарида.
Бироқ президентнинг 19 апрелдаги қарори билан тўлов тизими давлат акциялари ёки акциялар пакетлари очиқ кимошди савдосига қўйилиши керак бўлган 247 та компания рўйхатига киритилган.
