Ўзбекистон Компартияси Марказий Қўмитасининг собиқ мафкуравий котиби Раъно Абдуллаева 12 январь куни 89 ёшида вафот этди. Бу ҳақдаги маълумотни «Газета.uz»га манбалар тасдиқлади.
У 1935 йил 16 сентябрда Бухоро вилоятининг Шофиркон туманида туғилган. 1970−1987 йилларда Абдуллаева Ўзбекистон ССРда энг нуфузли шахслардан бири ҳисобланган.
Учувчи-космонавт, Совет Иттифоқи қаҳрамони Валентина Николаева-Терешкова Киров номли колхоз мудири Тарсуна Ахунова ва Ўзбекистон Комсомол Марказий Комитетининг биринчи котиби Раъно Абдуллаева (ўнгда) билан суҳбатлашмоқда. Манба.
1963−1971 йилларда Ўзбекистон комсомолининг биринчи котиби, сўнгра Ўзбекистон ССР Министрлар Совети раисининг ўринбосари, 1987 йилгача Ўзбекистон Компартияси Марказий Комитетининг мафкура бўйича котиби лавозимларида ишлаган.
У ЎзАга берган 2019 йилдаги интервьюсида Ўзбекистон ССР Коммунистик партияси Марказий қўмитасининг биринчи котиби Шароф Рашидов, «пахта иши,» мафкуранинг ўрни ҳақида гапириб берган эди.
«Ҳар куни юз минглаб одамлар метродан фойдаланади. Метро қурилишига эришиш учун Шароф Рашидович бир неча бор Брежнев ҳузурига борди, тез-тез Министрлар Советига ташриф буюрди. У Мурунтовда олтин конини очишга муваффақ бўлди, бу лойиҳани амалга ошириш учун 10 йил керак бўлди», — деди у.
Абдуллаева, шунингдек, СССР даврида ўзбек кадрлари тақдири ҳақидаги қарорлар кўпинча маҳаллий воқеликни ҳисобга олмаган ҳолда Москвада қабул қилинганини, бу эса баъзан ноҳақ айбловлар ва қатағонларга олиб келганини таъкидлаган.
У Атом энергияси агентлиги («Ўзатом») нинг ҳозирги раҳбари Азим Ахмедхаджаевнинг ҳам бувиси бўлган.
