Исроил ва Фаластиннинг ҲАМАС гуруҳи ўртасида Ғазо секторида ўт очишни тўхтатиш ва исроиллик гаровга олинганларни озод қилиш бўйича музокаралар «якуний босқичда», деб ёзди The Times of Israel келишувда воситачилик қилаётган Қатар ТИВ баёнотига таяниб.
«Биз якуний босқичда эканимизга чин дилдан ишонамиз… Охирги ойларда томонлар ўртасида катта тўсиқлар ҳал этилмай қолаётганди. Бу тўсиқлар сўнгги бир неча ҳафта давомида музокаралар орқали ҳал қилинди», — деди Қатар ТИВ матбуот котиби Мажид ал-Ансорий сешанба куни бўлиб ўтган матбуот анжуманида.
Музокараларга яқин фаластинлик манбанинг Reuters агентлигига айтишича, агар «ҳаммаси яхши ўтса», келишув 14 январда имзоланиши кутилмоқда. Исмини ошкор этмаган исроиллик мулозимнинг таъкидлашича, келишувнинг баъзи тафсилотлари якунланиши лозим.
Associated Press танишган уч босқичли келишув лойиҳасига кўра, ҲАМАС дастлабки олти ҳафта ичида Исроилда асирга олинган юзлаб фаластинлик аёллар ва болалар эвазига 33 нафар исроиллик гаровга олинганларни, жумладан, аёллар, болалар, қариялар ва ярадорларни озод қилади. Биринчи босқичда, шунингдек, Исроил Ғазо аҳоли пунктларидан қўшинларини олиб чиқиб кетади ва фаластинликларга анклав шимолига қайтишга рухсат беради. Бундан ташқари, Исроил ҳар куни 600 га яқин гуманитар юк машинасини Ғазога киритиши керак бўлади.
Иккинчи босқич тафсилотлари биринчисини амалга ошириш жараёнида келишиб олинади, бироқ ҲАМАС қолган тирик асирларни, асосан эркакларни фаластинлик асирлар эвазига озод қилиши, Исроил эса қўшинларини Ғазодан «тўлиқ олиб чиқиши» кутилмоқда.
Учинчи босқичда ҲАМАС халқаро назорат остида амалга ошириладиган Ғазони қайта қуриш режаси эвазига қолган гаровга олинганларнинг жасадларини қайтаради.
- Ўтган ҳафта АҚШнинг сайланган президенти Дональд Трамп агар у лавозимга киришгунга қадар исроиллик гаровга олинганлар қайтарилмаса, Яқин Шарқда «ҳақиқий жаҳаннам» бошланиши билан таҳдид қилган эди.
