Paynet Миллий банклараро процессинг маркази, Humo банк карталари операторини харид қилганига муносабат билдирди.
Бир кун аввал Давлат активларини бошқариш агентлиги Humo’нинг 100 фоиз давлат улушини «очиқ савдо жараёнлари» орқали уч босқичда сотгани хабар қилинганди. Битим суммаси 65 миллион долларни ташкил этган.
Молиячи Отабек Бакиров Paynet тўлов хизмати икки банк (улардан бири — Asia Alliance Bank), энди эса Humo тўлов тизими билан ҳам аффилланганини таъкидлади . У ушбу икки банк бошқа 34 та банкка нисбатан қулайроқ шарт-шароитларга эга бўлиши мумкинлигидан хавотир билдирди, Paynet эса Humo’га яқинлиги туфайли 40 дан ортиқ рақобатчилардан (Payme, Click, Uzum ва бошқа тўлов хизматлари) устунликка эга бўлади.
Paynet’нинг таъкидлашича, у миллий тўлов тизимларини ривожлантириш бўйича саъй-ҳаракатларни бирлаштириш, рақамли иқтисодиёт ва тадбиркорликни яхшилашни рағбатлантириш мақсадида тўловларнинг янги шакл ва усулларини жорий этишни жадаллаштириш учун илғор молиявий ва рақамли технологияларни йўлга қўйиш йўлида адолатли рақобат тамойилларига содиқ.
«Биз Humo’нинг тўлов бозорининг бошқа иштирокчилари билан синергияси нафақат ютуқларимизни сақлаб қолиш, балки ошириш, бозордаги ўрнимизни мустаҳкамлаш ва узоқ муддатли мақсадларимизни самарали амалга ошириш имконини беришига ишончимиз комил. Бизнес жараёнларини такомиллаштириш, маҳсулот ва хизматлар турларини кенгайтириш, шунингдек, янги технологияларни жорий этиш орқали компаниялар аҳоли ва бизнес учун янада сифатли, арзон ва инновацион ечимларни тақдим этиш имкониятига эга бўлади», — деди Paynet бош директори Анвар Исомуҳамедов.
Humo’нинг ўтган йилнинг 9 ойидаги соф фойдаси 119,3 миллиард сўмни (9,2 миллион доллар) ташкил қилган. Биргина учинчи чоракда бу кўрсаткич 47,5 миллиард сўмга етган. Бутун 2024 йил учун соф фойда 13 миллион долларни ташкил қилган бўлиши мумкин.
Paynet — Ўзбекистондаги энг йирик тўлов операторларидан бири. Ўтган йилнинг тўққиз ойида Paynet’нинг соф фойдаси 208,4 миллиард сўмдан ошди, бу 2023 йилнинг шу даврига нисбатан қарийб 2 баробар кўп. Бугунги кунда тизим 1500 дан ортиқ товар ва хизматлар етказиб берувчилари учун тўлов имкониятларини тақдим этади, ойлик фойдаланувчилар сони эса 20 миллиондан ошади.
Paynet хизмати 2005 йилда Ботир Арифжонов томонидан яратилган. Кейинчалик тадбиркор компанияни Халқ банки кўринишида давлатга (60 минг долларга, гарчи активи 10 миллион долларга баҳоланган бўлса-да) сотишга ва бошқарувдан воз кечишга мажбур бўлган.
2022 йил август ойида Давактив Uzpaynet’нинг 100 фоиз улушини сотувга қўйганди. Кейинги бир ой ичида потенциал харидорлардан еттита ариза келиб тушган, бироқ таклифларни қабул қилиш «қўшимча аниқлаштиришлар» важи билан кейинга қолдирилган
Апрел ойида Paynet’ни бошқарувчи Uzpaynet’нинг таъсисчиси ўзгаргани маълум бўлди. ДАБА балансидаги давлат улушининг 100 фоизи New Industrial Technologies компаниясига ўтказилди. Давактив ўшанда жамоатчиликка хусусийлаштириш ҳақида хабар бермаган.
New Industrial Technologies компанияси 2019 йил апрелида давлат рўйхатидан ўтган, устав капитали 273,56 миллиард сўмни ташкил этади. Бугунги кунда ягона эгаси Мустафо Абдураҳмонов бўлиб, у, шунингдек, Asia Alliance Bank’нинг асосий акциядори ҳисобланадиган Asia Alliance Group’нинг 77,6% акцияларига эгалик қилади.
