Исроил ва ҲАМАС ўртасидаги музокараларда воситачилар томонларга Ғазо секторида сулҳ тўғрисидаги битимнинг якуний лойиҳасини топширди, деб хабар берди Reuters.
Унинг сўзларига кўра, 13 январга ўтар кечаси АҚШ, Қатар ва Миср каби воситачилар орқали бир йилдан ортиқ давом этаётган музокараларда «ютуқ»қа эришилди. Агентлик манбасининг айтишича, Қатар вакили томонларга ўт очишни тўхтатиш ва гаровга олинганларни озод қилиш тўғрисидаги битим матнини етказган.
Музокараларда АҚШнинг амалдаги президенти Жо Байден ва сайланган раҳбар Дональд Трампнинг элчилари, Исроилнинг «Моссад» ва ШАБАК махсус хизматлари раҳбарлари, шунингдек, Қатар бош вазири Муҳаммад бин Абдулраҳмон ал-Тани иштирок этгани таъкидланди.
Исроилнинг юқори мартабали амалдори Reuters агентлигига агар ҲАМАС таклифга жавоб берса, келишув бир неча кун ичида тузилиши мумкинлигини билдирган. Музокараларга яқин бўлган Фаластин расмийси Доҳадаги маълумотлар «жуда истиқболли» эканини айтди. ҲАМАС музокаралардаги олдинга силжишни тасдиқлади, деб ёзмоқда Times of Israel.
Сўнгги маълумотларга кўра, ҲАМАС 100 га яқин кишини гаровда ушлаб турибди. Тахминларга кўра, уларнинг учдан бир қисми ўлган.
Исроил ва ҲАМАС Ғазо секторида ўт очишни тўхтатиш, исроиллик гаровга олинганларни озод қилиш, шунингдек, юзлаб фаластинлик маҳбусларни, жумладан, терроризм учун ҳукм қилинганларни Исроил қамоқхоналаридан озод қилиш бўйича келишув тузиши кутилмоқда.
Тахминларга кўра, томонлар 20 январь — АҚШ президенти этиб сайланган Дональд Трампнинг инаугурация кунигача келишувга эришмоқчи. Аввалроқ у ҲАМАСга агар у президентлик лавозимига киргунга қадар исроиллик гаровга олинганлар озод қилинмаса, Яқин Шарқни жаҳаннамга айлантириш билан таҳдид қилганди.
Reuters нашрининг таъкидлашича, иккала томон ҳам ўт очишни тўхтатиш, гаровга олинганлар ва маҳбусларни алмаштиришга рози. Бироқ ҲАМАС келишув Исроил қўшинларининг Ғазодан чиқиб кетишига олиб келишини талаб қилмоқда, Исроил эса ҲАМАС йўқ қилинмагунча урушни тўхтатмаслигини айтади.
