Терговчилар 15 январь куни Жанубий Кореянинг ҳокимиятдан четлатилган президенти Юн Сок Ёлни исёнчиликда айблаб ҳибсга олди, деб хабар бермоқда Yonhap. Уни сўроқ қилиш учун олиб кетишди.
Юқори мартабали амалдорлар ўртасидаги коррупцияни тергов қилиш бошқармаси (CIO) маълумотларига кўра, Юнни ҳибсга олиш учун буйруқ маҳаллий вақт билан соат 10:33 да ижро этилган. Полиция бинога киришни таъминлаш учун 3000 га яқин ходим юборди. У сўроқдан сўнг бошқарма яқинида — Уивангдаги Сеул ҳибсхонасида ушлаб турилиши кутилмоқда. Бу амалдаги, лекин ҳокимиятдан четлатилган давлат раҳбарининг қўлга олинишидаги илк ҳолатдир.
Президентнинг сўзларига кўра, у «қон тўкилишининг олдини олиш» учун сўроққа ўз ихтиёри билан келишга қарор қилган. У ўзининг таъқиб қилинишини ноқонуний деб ҳисоблайди.
Ҳибсга олиш терговчилар ва Юннинг тарафдорлари ўртасида унинг қароргоҳида юз берган, соатлаб давом этган қарама-қаршиликлардан сўнг содир бўлди. «Айни пайтда биз унинг ихтиёрий равишда келишини кўриб чиқмаяпмиз, мақсадимиз ордерни ижро этишдир… Биринчи уринишдан фарқли ўлароқ, ижрога фаол қаршилик кўрсатган ходимлар ёки Президент хавфсизлик хизмати ходимлари йўқ эди», — деди журналистларга CIO расмийси.
- Президент Юн Сок Ёль 3 декабрь куни кечқурун Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлаган. Унинг сўзларига кўра, бундай чорани мухолифат ҳаракатлари туфайли қўллаган.
- Бир неча соатдан сўнг парламент президент қарорини блоклади ва Юн уни бекор қилишга мажбур бўлди. Кейинги бир неча кун ичида Жанубий Корея Мудофаа вазирлиги раҳбари Ким Ён Хён истеъфога чиқди ва президент, собиқ вазир ва бошқа бир қатор мансабдор шахсларга нисбатан тергов бошланди. Улар исён, давлатга хиёнат ва ўз ваколатларини суиистеъмол қилишда гумонланмоқда.
- 14 декабрь куни Жанубий Корея парламенти иккинчи уринишда Юнга импичментни қўллаб-қувватлади. Унинг президентлик ваколати тўхтатилган.
- CIO терговчилари 3 январь куни президент қароргоҳида Юн Сок Ёлни ушлашга уринган, аммо қўриқчилар киришни тўсиб қўйганидан кейин ҳаракат муваффақиятсизликка учраган. 7 январда Сеул округ суди Юн Сок Ёлни ҳибсга олиш ордерини узайтирган. CIO раҳбари О Дон Ун Юнни ҳибсга олишга муваффақиятсиз уриниши учун узр сўраган ва иккинчи уринишда буйруқни бажаришга ваъда берганди.
