Ўзбекистонда автомобилларни жамоат транспорти ва махсус транспорт (тез ёрдам, ўт ўчириш бригадалари) учун мўлжалланган йўлакларда ҳайдаганлик учун жарима жорий этилиши кутилмоқда. Бу Олий Мажлис Қонунчилик палатасининг сешанба кунги мажлисида қабул қилинган қонунда назарда тутилган. Ҳужжат тасдиқлаш учун Сенатга юборилди.
Амалдаги Йўл ҳаракати қоидалари аллақачон йўналишли транспорт воситалари учун йўлакларда ҳаракатланиш ва тўхташни тақиқлайди. Фақатгина узуқ чизиқ чизилган жойдагина қайрилиб олиш учун уни кесиб ўтиш ёки, агар жамоат транспорти ҳаракатига халақит бермаса, йўловчиларни олиш ва тушириш учун мумкин. Бироқ ушбу қоидаларни бузганлик учун жарима белгиланмаганди.
Маъмурий жавобгарлик тўғрисидаги кодексда жамоат транспорти учун белгиланган йўлакларда йўл ҳаракати қоидаларини бузганлик учун жавобгарликни белгиловчи қоидалар мавжуд.
МЖТКнинг таклиф этилаётган янги 128−7-моддасида даставвал биринчи қоидабузарлик учун БҲМнинг 3 баравари (1,125 миллион сўм), бир йилда такрорий қоидабузарлик учун 5 баравари (1,875 миллион сўм) миқдорида жарима солиш назарда тутилган эди.
Худди шу модданинг учинчи қисмида ёндош ҳудуддан чиқиб жамоат транспорти учун алоҳида ажратилган йўлакни бўшатган ҳолда, йўлнинг қатнов қисмидан ўтаётган транспорт воситаларига йўл бермаслик учун БҲМнинг 1 баравари миқдорида жарима таклиф қилинган.
Аммо депутат Улуғбек Кабуловнинг таъкидлашича, жарима миқдорини камайтиришга (йиғилишда қанчагалиги айтилмаган), модданинг учинчи қисмини эса йўл ҳаракати қоидаларида бу норма назарда тутилмагани, амалда тушунмовчиликларга олиб келиши мумкинлиги сабабли чиқариб ташлашга қарор қилинган.
Парламентарийнинг таъкидлашича, Нью Йорк штатида (АҚШ) ажратилган йўлакда ҳайдаганлик учун жарима 50 дан 250 долларгачани ташкил этади, Францияда — 35 дан 135 еврогача, Германияда — 135 еврогача, Беларусда — 12 ва 24 долларни (биринчи ва такрорий ҳуқуқбузарлик учун), Қозоғистонда — 7 ва 70 доллар.
Шу билан бирга, оператив ва махсус хизматларнинг автотранспорт воситаларига ушбу йўлаклар бўйлаб ҳаракатланиш, шунингдек, ёндош ҳудуддан узуқ чизиққа ёки энг яқин участкага кириш ёки чиқишдан 50 метр масофада йўлакка киришга рухсат берилади. Бу йўлак бўйлаб жамоат транспортининг ҳаракатига тўсқинлик қилмагандагина мумкин. Бундан ташқари, йўловчиларни олиш ва тушириш учун энг ўнгдаги йўлакка тўхташга рухсат берилади.
Декабрь ойида Қонунчилик палатаси спикери Нуриддин Исмоилов жазо жорий этиш таклифини танқид қилиб, ҳайдовчи бир вақтнинг ўзида иккита қоидабузарлик — ажратилган йўлакка чиқиб кетгани ва йўл белгилари (жамоат транспорти йўлагини кўрсатувчи белги) талабларига риоя қилмагани учун жарима тўлаши керак бўлиб қолаётганини айтган эди.
Шу сабабли МЖТКнинг 128-моддасида (Ҳайдовчиларнинг транспорт воситаларини пиёдалар йўлкаларидан юргизиши, йўл белгилари ва йўл ҳаракатининг бошқа қоидалари талабларига риоя этмаслиги) ажратилган йўлакларда ҳаракат қилганлик учун фақат битта — 128−7-модда билан жарима белгиланишига доир аниқлик киритилмоқда.
