Қозоғистонда коррупционерларнинг ошкора реестри пайдо бўлади. Бу ҳақда Коррупцияга қарши курашиш агентлиги раисининг биринчи ўринбосари Улан Саркулов маълум қилди, деб хабар бермоқда Tengrinews.kz.
«Бу профилактика воситасидир. Унинг асосий мақсади жамоатчиликнинг қоралаши орқали жамиятда коррупцияга нисбатан муросасизликни шакллантиришдан иборат. Реестрга оғир ва ўта оғир коррупцияга оид жиноятларни содир этганлик учун судланган шахслар тўғрисидаги маълумотлар киритилади. Шахсларни реестрга киритиш учун қонуний кучга кирган айблов ҳукми асос бўлади», — дея тушунтирди Саркулов.
Маълум қилинишича, бундай шахсларни қонуний кучга кирган оқлов ҳукми ва судланганлик ҳолати тугаллангани асосида реестрдан чиқариш мумкин бўлади. Реестр агентлик сайтида жойлаштирилади.
2022 йилда Коррупцияга қарши курашиш хизмати соҳага оид қонунчиликка ўзгартиришлар киритиш лойиҳасини тақдим этган эди, унинг доирасида илк бор коррупционерлар реестрини яратиш таклиф қилинганди.
Ўз навбатида, Ўзбекистонда ҳам бундай реестр учун қонун лойиҳаси 2022 йил бошида ишлаб чиқилган, 2023 йилда бошқа вазирлик ва идоралар томонидан маъқулланган. 2024 йил сентябрида Коррупцияга қарши кураш агентлиги директори Акмал Бурханов коррупционерлар реестрининг ишга туширилиши кечиктирилганига изоҳ берганди.
