Исроил ва ҲАМАС ўт очишни тўхтатишга келишиб олгани ҳақида ёзгандик, Қатар бош вазири Муҳаммад Ал Танийнинг Доҳадаги матбуот анжуманида маълум қилишича, ҳарбий ҳаракатлар 19 январдан тўхтатилади.
«Қатар, Миср ва АҚШ Ғазо секторидаги урушаётган томонлар асирлар ва гаровга олинганларни алмашиш бўйича келишувга эришганидан сўнг қўшма воситачилик ҳаракатларининг муваффақиятини эълон қилишдан мамнун», — деди Ал Таний.
Reuters манбасининг айтишича, ўт очишни тўхтатишнинг биринчи босқичи олти ҳафтага мўлжалланган. ҲАМАС 33 нафар исроиллик гаровга олинганларни, шу жумладан, барча аёллар (аскарлар ва фуқаролар), болалар ва 50 ёшдан ошган эркакларни озод қилади. Бунинг эвазига Исроил юзлаб фаластинлик маҳбусларни қамоқдан чиқаради.
Битимнинг иккинчи босқичи бўйича музокаралар биринчи босқич амал қиладиган 16-кунга қадар бошланиши керак. У барча гаровга олинганларни озод қилиш, ўт очишни тўхтатиш ва Исроил қўшинларини Ғазо ҳудудидан тўлиқ олиб чиқишни ўз ичига олиши кутилмоқда.
Учинчи босқич ҳалок бўлган гаровдагиларнинг қолган жасадларини қайтариш ва Миср, Қатар ҳамда БМТ назорати остида Ғазо ҳудудини қайта тиклашни бошлашга бағишланади.
Исроил армияси, шунингдек, Ғазо секторидан озод қилинган гаровга олинганларни қабул қилишга тайёргарлик кўриш бошланганини расман эълон қилди, операция «Озодлик қанотлари» деб номланган, деб таъкидлайди The Times of Israel.
