АҚШ Қирғизистоннинг «Керемет Банк»ига қарши Россияга нисбатан савдо чекловларини четлаб ўтишга ёрдам бергани учун санкциялар киритди. Бу ҳақда АҚШ Молия вазирлигининг Хорижий активларни назорат қилиш бошқармаси (OFAC) баёнотида сўз боради. Бу Америка санкциялари остида қолган Марказий Осиёдаги биринчи банкдир.
Вазирликнинг таъкидлашича, 2024 йилнинг ёзидан бери банк ўз ҳаракатларини Россия расмийлари ва АҚШ санкциялари рўйхатига киритилган «Промсвязьбанк» билан мувофиқлаштирган. Санкцияларни четлаб ўтиш схемасини амалга ошириш учун «Керемет Банк» ПСБ номидан трансчегаравий пул ўтказмаларини амалга оширган. АҚШ Молия вазирлиги 2022 йилда Россия мудофаа саноатини молиявий қўллаб-қувватлагани учун ПСБга қарши санкциялар киритганди.
OFAC маълумотларига кўра, 2024 йилда Қирғизистон Молия вазирлиги «Керемет Банк»нинг назорат пакетини «Россия ҳукумати билан алоқадаги россиялик олигарх билан яқин алоқада бўлган» фирмага сотган.
««Керемет Банк»ни сотиб олиш Россия учун импорт тўловларини тўлаш ва экспорт тўловларини олиш учун санкциялардан қочиш ҳабини яратишга қаратилган эди», — дейилади хабарда.
«Керемет Банк» OFAC айбловларини рад этиб, «миллий қонунчилик ва халқаро ҳуқуққа қатъий риоя қилган ҳолда» ишлаётганини билдирди. Банк, шунингдек, OFAC`га қарор устидан шикоят қилиш учун мурожаат қилишини маълум қилди.
Россиянинг Украинага кенг кўламли бостириб кириши бошланганидан бери АҚШ Марказий Осиё компанияларига чекловларни четлаб ўтгани учун бир неча бор санкциялар киритган. Шундай қилиб, 2024 йил октябрь ойида OFAC Россиянинг технологик ва саноат секторидаги фаолияти учун Ўзбекистоннинг иккита компаниясини санкциялар рўйхатига қўшган.
