Тошкент метрополитени ва почта бўлимларида АТТО транспорт карталарининг йўқлиги чайқовчилик билан боғлиқ. Бу ҳақда «Газета.uz»га АТТО директори Даврон Шоёқубов маълум қилди.
Унинг сўзларига кўра, 2024 йилда фуқаролар жами 200 минг, декабрь ва январь ойининг биринчи 9 кунида эса 110 минг карта харид қилган.
«Йўловчилар қўнғироқ қилиб, карталар нархини оширганимизни айтишди. Кассаларда карталар йўқ, лекин метрога кираверишда уларни 30−40−50 мингга сотишяпти, дейишди. Маълум бўлишича, чайқовчилар карталарни харид қилиб, уларни қайта сотаётган экан», — деди Даврон Шоёқубов.
АТТО метро ва UzPost`га бир кишига иккитадан ортиқ карта сотмаслик бўйича хат юборди
Компания маълумотларига кўра, 10 январь куни савдога 50 мингта карта чиқарилган, лекин партия тез тугаган. 18 январь куни яна 50 мингта карта келиши, январь ойи охиригача эса яна 200 мингта карта савдога чиқарилиши кутилмоқда.
Шу билан бирга, кўп сонли карталар фаоллаштирилмаган ҳолда сақланмоқда. Ҳозирда аҳолининг қўлида 1,7 млн карта мавжуд. Ҳар куни йўловчилар автобусларда 500 марта, метродаги саёҳатларда эса 140 марта тўлов амалга оширади.
«Жами бу 640 минг қатнов ва тахминан 300 мингга яқин йўловчини ташкил этади. Бу дегани 1,7 млн картадан фақат 300 мингтаси ишлатилади. Қолган 1,4 млн карталар қаерда? Агар назарий жиҳатдан 400 минг карта бузилган ёки йўқолган деб оладиган бўлсак, яна 1 млн карта қолади. Улар жавонларда ёки сотувчилар ва чайқовчилар қўлида ётибди», — дея хулоса қилди АТТО.
Компания транспорт карталарида амал қилиш муддати кўрсатилган бўлишига қарамай, уларнинг амал қилиш муддати йўқлигини эслатиб ўтди. Автобусларда нақд пул қабул қилишни тўхтатиш олдидан, янги транспорт карталарига бўлган эҳтиёжни камайтириш мақсадида, АТТО барча транспорт карталари учун амал қилиш муддатини бекор қилди.
