Истиқболли лойиҳалар миллий агентлиги энг йирик криптобиржаларидан бири — Binance томонидан Ўзбекистон фойдаланувчиларига (резидентларига) хизмат кўрсатиш масаласини ҳал қилди. Бу ҳақда агентлик ахборот хизмати хабар қилди.
Мамлакат ҳудудида Binance криптобиржаси ўз фаолиятини қонунчилик билан белгиланган тартибда маҳаллий CoinPay МЧЖ орқали амалга оширишни режалаштирмоқда. CoinPay компанияси крипто-активлар айланмаси соҳасида расмий хизмат кўрсатувчи провайдер бўлиб, у крипто-биржа ва криптодўкон фаолиятини амалга ошириш учун тегишли лицензияларга эга.
Ўзбекистон резидентлари Binance платформасига CoinPay’нинг тегишли ресурслари (coinpay.uz) орқали киришларига имконият берилади. Шу билан бирга, фойдаланувчилар ўз маблағларини банк карталари ва миллий тўлов тизимлари орқали миллий валютада киритиш ҳамда чиқариш имкониятига эга бўлади.
Тизимни ишга тушириш, ҳамкорлар платформаларининг барча модуллари, жумладан, миллий тўлов тизимлари билан интеграциялашганидан сўнг амалга ошириш режалаштирилган. Тизимнинг ишга туширилиши ҳақида ҳамкорларнинг расмий ресурсларида (CoinPay и Binance) қўшимча равишда эълон қилинади.
2024 йилнинг январь ойида Агентлик томонидан Binance криптобиржасига нисбатан Ўзбекистон қонунчилиги, хусусан, криптоактивлар айланмаси соҳасидаги қонунчилик талабларини бузганлиги учун жарима қўллаш ҳақидаги қарор қабул қилинган эди. Шундан сўнг, тегишли даъво аризаси Тошкент шаҳар иқтисодиёт судига юборилган.
2024 йилнинг 26 мартидан 7 июнига қадар жавобгар (Binance криптобиржаси) вакили иштирокида давом этган суд жараёнлари якунига кўра, суд агентликнинг аризасини тўлиқ қондириш ҳамда криптобиржадан 300 базавий ҳисоблаш миқдорига тенг бўлган жаримани Ўзбекистон бюджетига белгиланган тартибда ундириш ҳақида қарор қабул қилган.
Binance криптобиржаси суднинг барча талабларини бажарганлигини ҳамда жаримани қонунчиликда белгиланган тартибда Давлат бюджетига тўлиқ тўлаган.
