2024 йилда 483 нафар мигрантнинг жасади Ўзбекистонга қайтарилди. Бу ҳақда 17 январь куни Вазирлар Маҳкамаси ҳузуридаги Миграция агентлиги раҳбарияти иштирокида АОКАда ўтказилган матбуот анжуманида маълум қилинди, дея хабар бермоқда «Газета.uz» мухбири.
Агентлик бошқарма бошлиғи Нигора Исроилованинг маълум қилишича, чет элларда вафот этган ўзбекистонликларнинг жасадларини Ўзбекистонга олиб келиш харажатлари давлат бюджети ҳисобидан қопланган.
«Жасадларни олиб келиш харажатлари, қайси давлатдан эканлигига қараб, турлича ҳисобланади. Мисол учун, Россиядан битта жасадни олиб келишга 1000 долларгача, Англиядан 4−5 минг долларгача, Япония, Кореядан эса 9 минг долларгача маблағ кетади», — деди у.
Исроилованинг қайд этишича, хорижда вафот этган Ўзбекистон фуқароси бўлса ва унинг яқинлари агентликка мурожаат қилсагина, жасадни олиб келишда кўмак кўрсатилади.
Миграция агентлиги ахборот хизматининг «Газета.uz»га маълум қилишича, ўтган йили Ўзбекистонга қайтарилган 483 жасаднинг 474 таси Россиядан, 5 таси Туркиядан, 4 таси Корея ва Қозоғистондан олиб келинган.
Қўшимча қилинишича, 2024 йили хорижда оғир турмуш шароитига тушиб қолган 775 нафар, оғир тан жароҳати олган 182 нафар ўзбекистонлик ҳам агентлик кўмаги билан Ўзбекистонга қайтарилган.
