Камбағалликни қисқартириш ва бандлик вазирлиги 2024 йилнинг март ойида Канада ўзбекистонликларга 5 минг бўш иш ўрни таклиф этаётгани ҳақида хабар берганди. Канада иш берувчилари билан эришилган келишувга кўра, Ўзбекистон фуқаролари қурилиш, хизмат кўрсатиш ва техник соҳаларга ишга таклиф қилинган. Номзодлар 18 ёшдан 45 ёшгача бўлиши, инглиз, француз ёки испан тилларидан бирини билиши, қурилиш касб-таълими мутахассислиги бўйича гувоҳнома, сертификат ёки дипломли бўлиши зарурлиги, иш ҳақи эса соатига 12,5 АҚШ долларидан 30 АҚШ долларигача тўланиши таъкидланган.
2025 йил 17 январь куни АОКАда Миграция агентлиги раҳбарияти билан ўтказилган матбуот анжуманида шу вақтгача қанча ўзбекистонлик Канадага ишга юборилгани ҳақидаги мавзу ҳам кўтарилди, дея хабар қилмоқда «Газета.uz» мухбири. Агентлик директори ўринбосари Азимжон Ҳусановнинг сўзларига кўра, Канада томони ишлашга номзодларга қатъий талаблар қўйган.
«Мен ўзим Канадада ўқиганман, ишлаганман ва яшаганман. Биласиз, малакали кадр бўлса, бизнинг ёрдамимизсиз ёки консалтинг хизматига бормасдан ҳам ўзи бемалол рўйхатдан ўтиб, иммиграцион визаларига топширса бўлади. Лекин, [агентликка ишга келганимиздан сўнг] суриштирдик, ким билан қандай шартномалар қилинган, нималар ваъда қилинган? [Канада бўйича] шартнома шартларида [ишга борувчиларга] шу даражада қаттиқ талаблар қўйилганки, оддий мисол — сантехник учун олий маълумот ва 7,5 IELTS талаби қўйилган…», — дейди агентлик расмийси.
Фото: АОКА
«Мана, Германия ҳам бошида шундай талаблар қўйган эди. Тил билиш бўйича C1 сертификатини сўраган, ўзаро келишувлардан кейин бу B2 даражасигача тушди, ҳозир эса талабни B1 гача туширишга ҳаракат қиляпмиз. Канада билан ҳам худди шундай. Канада билан тўғридан-тўғри, тезроқ иш юритолмаётганимизнинг ягона сабаби — у ерда ваколатхонамиз ё элчихонамиз йўқ», — дейди Ҳусанов.
Миграция агентлиги ахборот хизматининг «Газета.uz»га маълум қилишича, 2024 йилги эълон бўйича Канадада ишлашга 35 минг ўзбекистонлик қизиқиш билдирган. Шундан 100 нафари агентлик томонидан сараланиб, уларнинг номзоди Канада томонига тақдим этилган. Аммо 100 номзоднинг барчаси рад этилган.
«Агентликнинг янги раҳбарияти 2025 йилнинг биринчи қисмида Канада ва шу каби бир қатор иқтисодий ривожланган ҳамда иш ўринлари мавжуд давлатлардаги иш берувчилар билан мулоқотлар ўтказиш, уларнинг талаблари ва шароитлари билан танишишни режалаштирмоқда», — дейилади агентлик ахборотида.
Маълумот учун, Канаданинг Қозоғистон, Қирғизистон, Тожикистон, Туркманистон ва Ўзбекистондаги элчиси Aлан Ҳэмсон 2024 йил июнида «Kun.uz»га берган интервьюсида Ўзбекистон билан миграция масаласида ҳеч қандай келишув бўлмаганини айтган эди.
«Элчилик вазифасига тайинланиб, январь ойида ишонч ёрлиғини топшириш учун Тошкентга келганимда ҳукумат вакиллари, Камбағалликни қисқартириш ва бандлик вазирлиги раҳбарияти билан учрашганман. Учрашувда кўплаб масалалар муҳокама қилинган. Бироқ орадан бироз вақт ўтиб, адашмасам март ёки апрел ойларида, Ўзбекистон фуқароларини Канадага ишга юбориш бўйича келишувга эришилди, деган хабарлар тарқалди. Шуни таъкидлаб ўтмоқчиманки, бу гаплар ҳақиқатга тўғри келмайди. Ҳозирча икки ўртада бу масалада ҳеч қандай келишув йўқ», — деганди Алан Ҳэмсон.
Аввалроқ, Ўзбекистонда 2025 йилда Канадада бош консулхона очиш имкониятини кўриб чиқаётгани маълум бўлган эди.
