Ижтимоий тармоқларда Сурхондарё вилояти Бойсун туманидаги «Мустақилликнинг 25 йиллиги» кони жойлашган ҳудудда газ чиқаётгани, оловли майдонлар ҳисол бўлгани акс этган видеотасвир пайдо бўлди. Энергетика вазирлиги буни кон ҳудудидаги кичик ҳажмда тўпланган газ деб атади ва уни хавфсиз ёқиш ишлари бошланганини маълум қилди.
Вазирлик хабарига кўра, «М-25» ҳудудида ҳеч қандай кутилмаган вазият кузатилмаган. Бугунги кунда 2024 йил сентябрь ойида метан эмиссияси содир бўлган қудуқ ўрнида объектни консервация қилиш бўйича режалаштирилган ишлар олиб борилмоқда ва бу ерда доимий мониторинг юритиляпти, қайд этди ташкилот.
Жумладан, 604-сонли қудуқда тозалаш ишлари олиб борилаётганда қудуқдан олис ҳудудларда ер юзасига яқин жойлашган бўшлиқлар ва коллекторлардаги микроёриқларда кичик ҳажмдаги газ тўпланган.
Айни пайтда ҳудудда кичик ҳажмда тўпланган газни ёқиш орқали зарарсизлантириш ишлари олиб борилмоқда. Энерговазирликнинг тушунтиришича, бундан кўзланган мақсад кислотали газларнинг атмосферага чиқишини олдини олишдан иборат.
«Ушбу жараён атроф-муҳит ифлосланишининг олдини олишда стандарт ёндашув ҳисобланади ва халқаро саноат хавфсизлиги талабларига тўла жавоб беради», — дейилади хабарда.
Таъкидланишича, режалаштирилган консервация ва профилактика ишлари мазкур технологик жараённинг ўзига хос хусусиятларини тушунмайдиган одамлар бошқача талқин қилиши мумкин бўлган бир қатор операциялардан иборат.
Эслатиб ўтамиз, Сурхондарёнинг Бойсун туманидаги «Мустақилликнинг 25 йиллиги» (М-25) газ кони қудуқларидан бирида 1 сентябрь куни бурғилаш ишлари вақтида техноген фалокат юз берган эди, сентябрь ўрталарида «Газета.uz» жамоаси у ердан репортаж тайёрлаган эди.
Таҳририят аъзолари 1−2 ноябрь кунлари Бойсунда бўлиб, техноген офатдан энг кўп азият чеккан Кофрун шаҳарчаси аҳолиси, Бойсундаги техникум ётоқхонасига эвакуация қилинган оилалар, газдан заҳарланиб, даволанишда бўлган фуқаролар, шунингдек, қудуқдаги иккинчи авария оқибатида ҳалок бўлган йигитлардан бирининг қариндоши билан суҳбатлашган. Мавзу билан батафсил қуйидаги линклар орқали танишиш мумкин.
