Қозоғистон 18 январдан хорижга картошка экспортини тақиқлади. Чеклов олти ой давомида амал қилади, дея хабар қилди мамлакат ҳукумати матбуот хизмати.
Қозоғистон ҳукуматининг қайд этишича, бундай чора-тадбирлар ички бозорда нархларни барқарорлаштириш ва бозор иштирокчилари томонидан чайқовчиликнинг олдини олиш мақсадида кўрилган.
«Қўшни давлатлар, хусусан, Ўзбекистон томонидан талабнинг ортиши, шунингдек, экспорт нархларининг юқорилиги туфайли картошка экспорти 1,5 бараварга — 411 минг тоннадан 605 минг тоннагача ошди. Охирги ҳафтада экспортга ихтисослашган ишлаб чиқарувчиларда нархнинг 170 тенгедан 270 тенгегача кескин ўсиши қайд этилди», — дейилади расмий хабарда.
Тақиқ ЕОИИ мамлакатларига тааллуқли эмас, аммо бу йўналишдаги экспорт ҳам кузатиб борилиши айтилган.
«Шунингдек, мавжуд вазиятдан келиб чиқиб, 2025 йил 16 январдан экспорт учун фитосанитария сертификатларини бериш бутунлай тўхтатилди», — дея қўшимча қилган ҳукумат.
Мамлакат Қишлоқ хўжалиги вазирлиги ҳозирда Қозоғистонда 2025 йилнинг эрта ҳосилигача ички эҳтиёжни тўлиқ қоплаш учун етарли бўлган картошка захиралари мавжудлигини таъкидлади.
Ўтган йил давомида Қозоғистонда картошка нархи ўртача 37,7 фоизга ошганди. Сабаблар қаторида баҳорги сел келишлари, экиш кампанияси бошланишининг кечикиши, ёздаги ноқулай об-ҳаво кўрсатилган.
Ўзбекистон президенти ҳузуридаги Статистика агентлиги маълумотларига кўра, 2024 йилнинг январь-ноябрь ойларида мамлакатга 627 минг тонна картошка импорт қилинган. Бу ҳажмнинг 74,2 фоизи ёки 465,2 минг тоннаси Қозоғистон ҳиссасига тўғри келади. Бир йил давомида Ўзбекистонда картошка деярли 40 фоизга қимматлаган.
Президент Шавкат Мирзиёев ноябрь ойида Ўзбекистонда 10 та асосий турдаги озиқ-овқат маҳсулотини (картошка, пиёз, тухум, сут, ун, гуруч, ёғ ва бошқалар) ҳисобга олиш тизими ишга туширилишини маълум қилганди. Ўшанда Қишлоқ хўжалиги вазири талабни қондириш, жумладан, картошка ва шоли экиладиган майдонларни кенгайтириш, янги кунгабоқар уруғларини яратиш чора-тадбирлари билан таништирганди.