TikTok 19 январь куни АҚШда ўз фаолиятини тўхтатишга мажбур бўлганди ва мамлакатда блокланган биринчи йирик ижтимоий тармоққа айланганди. Илова App Store ва Google Play`дан олиб ташланди ва фойдаланувчилар аввал юклаб олинган версияларга кириш имкониятини йўқотди.
Бироқ, бир неча соат ўтгач, TikTok ўз фаолиятини тиклади. Платформага киришда фойдаланувчилар учун «Президент Трампнинг саъй-ҳаракатлари туфайли TikTok АҚШга қайтди!» деган хабар пайдо бўлди.
2024 йил апрель ойида АҚШнинг ўша пайтдаги президенти Жо Байден Хитойнинг ByteDance компаниясига TikTok`ни америкалик харидорларга сотиш ёки фаолиятини тўхтатиш мажбуриятини юкловчи қонун қабул қилганди.
Компанияга талабларни бажариш учун тўққиз ой — 2025 йил 19 январгача вақт берилганди. Қонун америкалик фойдаланувчилар маълумотларининг Хитой ҳукуматига етказилиши хавфи билан изоҳланган.
20 январь куни лавозимга киришаётган президент Дональд Трамп ByteDance`га харидор топиш учун вақт бериши, ўз фармони билан қонуннинг амал қилишини тўхтатишини билдирди.
«Мен қонун тўлиқ кучга киргунга қадар муддатни узайтирадиган фармонни имзолайман. Шундай қилиб, биз TikTok`ни ишончли қўлларда сақлаб қоламиз ва ишлашда давом этишига имкон берамиз», — деб ёзди Трамп ўзининг Truth Social саҳифасида.
«Мен Қўшма Штатларнинг қўшма корхонада 50% улушга эга бўлишини истардим… АҚШ розилигисиз TikTok мавжуд бўлмайди. Бизнинг розилигимиз билан у юзлаб миллиард долларга, эҳтимол, триллион долларга тушади», — дея қўшимча қилди Трамп.
Блокланишдан бир неча кун олдин платформанинг Илон Маскка сотилиши мумкинлиги ҳақида хабарлар пайдо бўлганди, дея эслатади Spot. Шунингдек, блогер MrBeast ҳам харидга қизиқиш билдирган.
