20 январь куни Дональд Трамп АҚШнинг 47-президенти лавозимида иш бошлади. Биринчи бўлиб унинг вице-президенти Жей Ди Вэнс, кейин эса Трампнинг ўзи қасамёд қилди. Маросим жонли эфирда намойиш этилди.
Совуқ об-ҳаво шароити туфайли инаугурация одатдагидек Капитолий зиналарида эмас, балки ротондада бўлиб ўтди.
Трамп ва унинг рафиқаси Мелания қасамёд қилишдан олдин Оқ уйни тарк этаётган Жо Байденнинг оиласи билан чойхўрлик қилди — бу президентлар алмашинувидаги анъанавий тадбир саналади (аммо Трампнинг ўзи Байден 2021 йилда лавозимга киришганида унинг инаугурациясини ўтказиб юборган ва чойхўрлик ташкил этилмаган).
Мексика чегарасида фавқулодда ҳолат эълон қилинади, Трамп буни ўзининг биринчи фармони билан амалга оширишга ваъда берди. Шу пайт зал ўрнидан туриб қарсак чалди. «Биз миллионлаб жиноятчи хорижликларни келган жойларига қайтариш жараёнини бошлаймиз», — деди у. Чегарага қўшин юборилади.
АҚШда 2024 йилги президентлик сайловлари натижалари 6 ноябрь куни эълон қилинганди. Улардан республикачи Дональд Трамп амалдаги президент Жо Байденнинг сайловдан кетиш ҳақидаги қароридан сўнг Демократик партиядан номзод этиб кўрсатилган рақиби Камала Ҳаррисни ортда қолдириб, ғалаба қозонди. Трамп иккинчи марта Оқ уй раҳбари бўлди — унинг президент сифатидаги биринчи муддати 2017 йилдан 2021 йилгача давом этган.
