Ўзбекистон президенти Шавкат Мирзиёев 21 январь куни Туркиянинг Болу музофотидаги тоғ-чанғи курортида юз берган кучли ёнғин оқибатида кўплаб инсонлар қурбон бўлгани ва жиддий жароҳат олгани муносабати билан Туркия президенти Ражаб Тоййиб Эрдоғанга ҳамдардлик йўллади.
Президент матбуот котибининг ёзишича, давлат раҳбари «қардош Туркия етакчиси ва халқига чуқур таъзия изҳор этиб, давлатимиз раҳбари марҳумларнинг оила аъзолари ва яқинларига сабр-тоқат ва бардамлик, жабрланганлар тез фурсатда соғайиб кетишини тилади».
Эслатиб ўтамиз, ёнғин 21 январга ўтар кечаси 11 қаватли меҳмонхонанинг тўртинчи қаватида бошланган, у тез орада бутун бинони қамраб олган. Сўнгги маълумотларга кўра, ёнғин оқибатида 66 киши ҳалок бўлди, яна 51 киши жароҳатланди.
Адлия вазири Йилмаз Тунч меҳмонхонадаги ёнғин билан боғлиқ тергов доирасида 4 киши, жумладан, бизнес эгаси ҳам қўлга олинганини билдирди.
Anadolu агентлигининг хабар беришича, президент Эрдоған ёнғин туфайли мамлакатда бир кунлик миллий мотам эълон қилган.
Ўзбекистон элчихонаси жабрланганлар орасида ўзбекистонликлар йўқлигини маълум қилди.
