20 январь куни Дональд Трамп АҚШнинг 47-президенти лавозимини расман эгаллади. «Газета.uz» унинг инаугурация нутқини баъзи қисқартиришлар билан келтиради.
Оқ уй веб сайтининг янгиланган бош саҳифасида Трампнинг сурати ва «Америка қайтмоқда» ёзуви, шунингдек, баёнот пайдо бўлди: «Мен ҳар куни танамдаги ҳар бир нафас билан сиз учун курашаман. Токи фарзандларимиз ва сиз муносиб бўлган кучли, хавфсиз ва фаровон Америка қурмагунимизча тинчланмайман. Бу ҳақиқатан ҳам Американинг олтин асри бўлади». Янгиликлар бўлимининг ягона саҳифасида президентнинг иккинчи муддатидаги устувор мақсадлари бандма-банд санаб ўтилган.
«Американинг олтин даври»
Американинг олтин асри ҳозирнинг ўзидаёқ бошланади. Шу кундан бошлаб юртимиз яна гуллаб-яшнайди ва бутун дунёда ҳурмат-эътибор қозонади. Биз барча мамлакатлар учун ҳасад (ёхуд ҳавас) манбаи бўлиб қоламиз ва бундан буён биздан фойдаланишларига йўл қўймаймиз. Трамп маъмуриятининг ҳар бир куни давомида мен Американи биринчи ўринга қўяман.
Суверенитетимиз қайтарилади. Хавфсизлигимиз тикланади. Одил судлов тарозиси қайта мувозанатлаштирилади. Адлия вазирлиги ва ҳукуматимиздан бузуқлик, шафқатсизлик ва адолатсизлик билан қурол сифатида фойдаланиш тўхтатилади. Ва бизнинг приоритетдаги вазифамиз — мағрур, фаровон ва озод миллатни барпо этиш бўлади.
Тез орада Америка ҳар қачонгидан ҳам буюк, қудратли ва алоҳида бўлади. Мен президентликка ишонч ва оптимизм билан қайтаман, биз ҳайратланарли, миллий муваффақият даврининг бошида турибмиз, ўзгаришлар тўлқини мамлакатни қамраб олмоқда, қуёш нури бутун дунёга ёғилмоқда ва Американинг бу имкониятдан ҳар қачонгидан ҳам кўпроқ фойдаланиш имконияти бор.
«Ҳукуматга ишонч инқирози»
Ҳукуматимиз ишонч инқирозига дуч келди. Кўп йиллар давомида радикал ва коррупциялашган тузум фуқароларимиздан ҳокимият ва бойликни тортиб олди, шу билан бирга, жамиятимиз устунлари қулатилиб, афтидан, бутунлай таназзулга юз тутди.
Энди эса ҳукуматимиз чет элларда узлуксиз давом этаётган фалокатлар кетма-кетлиги қаршисида қолиб, бир вақтнинг ўзида ўз уйидаги оддий инқирозни ҳам ҳал қила олмаяпти. Ҳукуматимиз улуғвор, қонунга итоаткор Америка фуқароларини ҳимоя қила олгани йўқ, лекин мамлакатимизга бутун дунёдан ноқонуний равишда кириб келган, қамоқхона ва руҳий касалликлар муассасаларига тааллуқли, хавфли жиноятчиларга бошпана ва ҳимоя бермоқда.
Бизда хорижий чегараларни ҳимоя қилиш учун чексиз маблағлар ажратган ҳукумат бор, лекин у Америка чегараларини ёки, энг муҳими, ўз одамларини ҳимоя қилишдан бош тортмоқда. Мамлакатимиз фавқулодда вазиятлар пайтида асосий хизматларни тақдим эта олмаяпти, чунки яқинда Шимолий Каролинадаги ажиб инсонлар билан шундай ёмон муносабатда бўлинди. Кўп ойлар олдин содир бўлган довулдан ҳали ҳам азият чекаётган бошқа штатлар бор.
Ёки Лос Анжелесни олайлик, бир неча ҳафта давомида фожиали тарзда ёнаётган ёнғинларни кузатиб турибмиз, ҳеч қандай ҳимояга ишоралар йўқ. Ёнғинлар авж олмоқда, ҳатто мамлакатимизнинг баъзи энг бой ва нуфузли кишиларининг уйларига ҳам бу ўз таъсирини кўрсатди, уларнинг баъзилари ҳозир шу ерда ўтирибди. Уларнинг энди уйи йўқ. Бу қизиқ, аммо бундай бўлишига йўл қўя олмаймиз. Ҳеч ким бунга қарши ҳеч нарса қилолмаяпти. Ва бу ҳолат ўзгаради.
Соғлиқни сақлаш тизимимиз табиий офатларга бардош бера олмаяпти, шу билан бирга, унга дунёнинг бошқа мамлакатларига қараганда кўпроқ пул сарфланмоқда. Таълим тизимимиз эса фарзандларимизга ўзларидан уялишни, кўп ҳолларда, биз жон-жаҳдимиз билан уларга беришга ҳаракат қилаётган муҳаббатимизга қарамай, ўз мамлакатидан нафратланишни ўргатяпти. Буларнинг барчаси бугундан бошлаб ва жуда тез ўзгаради.
Менинг сўнгги сайловларим даҳшатли хиёнатни ва кўпдан-кўп хиёнатларни бутунлай ҳамда узил-кесил орқага қайтариш учун мандат берди, бунда одамларнинг эътиқоди, бойлиги, демократияси ва, албатта, озодлиги ўзларига қайтарилади.
«Худо мени Американи яна буюк қилиш учун қутқарди»
Шу пайтдан бошлаб Американинг таназзули тугади. Бизнинг озодлигимиз ва миллатимизнинг шонли тақдири энди инкор этилмайди ва биз Америка ҳукуматининг яхлитлиги, компетентлиги ва содиқлилигини дарҳол тиклаймиз. Сўнгги саккиз йил давомида мен 250 йиллик тарихимиздаги ҳар қандай президентдан кўра кўпроқ синов ва қийинчиликларни бошдан кечирдим ва бу йўлда кўп нарсани ўргандим. Айтишим мумкинки, республикамизга қайтиш йўли осон кечмади.
Ишимизни тўхтатмоқчи бўлганлар менинг озодлигимни, ҳатто ҳаётимни ҳам тортиб олишга уриниб кўрди. Бундан атиги бир неча ой муқаддам Пенсильваниядаги ажойиб майдонда қотил отган ўқ қулоғимни яралади. Аммо мен ўшанда ҳаётим шунчаки қутқариб қолинмаганини ҳис қилардим ва ҳозир бунга янада кўпроқ аминман. Худо Американи яна буюк қилиш учун мени қутқарди. Раҳмат. Сизга катта раҳмат.
Шунинг учун биз ҳар куни америкалик ватанпарварлар маъмуриятимиз билан ҳар бир инқирозни муносиб тарзда, куч ва ғайрат билан қарши олишга ҳаракат қиламиз. Биз ҳар қандай ирқ, дин, ранг ва эътиқоддаги фуқароларга умид, фаровонлик, хавфсизлик ва тинчликни қайтариш учун мақсад ҳамда тезлик билан ҳаракат қиламиз. Америка фуқаролари учун 2025 йил 20 январь — Озодлик куни.
Умид қиламанки, биздаги сўнгги президентлик сайлови мамлакатимиз тарихидаги энг улуғ ва энг муҳим сайлов сифатида эсда қолади.
Умид қиламанки, бизнинг сўнгги Президент сайлови мамлакатимиз тарихидаги энг улуғ ва энг муҳим сайлов сифатида эсда қолади.
Ғалабамиз шуни кўрсатдики, бутун мамлакат тезда кун тартибимиз атрофида бирлашмоқда ва жамиятнинг деярли барча қатламлари: ёшлар ва кексалар, эркаклар ва аёллар, афро-америкаликлар, испан тилида сўзлашувчи америкаликлар, осиёлик америкаликлар, шаҳар, шаҳар атрофи ва қишлоқ аҳолиси томонидан қўллаб-қувватлаш кескин ошди ва, энг муҳими, биз барча — тебранувчи еттита штатда ишончли ғалабага эришдик, шунингдек, умумий овоз беришда миллионларча кўпроқ овоз олдик.
Миллий бирлик Америкага қайтмоқда, ишонч ва ғурур ҳар қачонгидан ҳам баланд. Биз қилаётган барча ишларда. Маъмуриятим мукаммалликка бўлган кучли интилиш ва тинимсиз муваффақиятлардан илҳомланади. Биз ватанимизни унутмаймиз. Биз Конституциямизни ҳам, Худони ҳам унутмаймиз. Бундай қилиш мумкин эмас.
«Тарихий фармонлар»
Бугун мен бир қатор тарихий фармонларни имзолайман. Бу ҳаракатлар ёрдамида биз Американинг тўлиқ тикланишини ва соғлом фикр инқилобини бошлаймиз. Ҳаммаси соғлом фикр ўлароқ.
Биринчидан, мен жанубий чегарамизда фавқулодда ҳолат эълон қиламан. Барча ноқонуний киришлар зудлик билан тўхтатилади ва биз миллион-миллион жиноятчи чет элликларни келган жойларига қайтариш жараёнини бошлаймиз.
«Мексикада қолиш» сиёсатимни тиклаймиз. «Тутдик ва қўйиб юбордик» амалиётига чек қўяман. Мен мамлакатимиз томон ҳалокатли бостириб киришни тўхтатиш учун жанубий чегарага қўшин юбораман.
Биз, шунингдек, картелларни хорижий террористик ташкилотлар деб тан оламиз. Ва 1798 йилдаги Хорижий душманлар тўғрисидаги қонунни қўллаб, ҳукуматимизга федерал ва давлат ҳуқуқни муҳофаза қилиш органларининг бутун ва тўлиқ ҳокимиятидан фойдаланиш, АҚШ ҳудудига, жумладан, шаҳарларимиз ва ички шаҳарларимизда ҳалокатли жиноятчиликни келтириб чиқарувчи барча хорижий тўдалар ва жиноий тармоқларни йўқ қилиш учун буйруқ бераман. Бош қўмондон сифатида менинг мамлакатимизни таҳдид ва тажовузлардан ҳимоя қилишдан юксакроқ масъулиятим йўқ ва мен айнан шуни қилмоқчи эдим. Биз буни ҳеч ким гувоҳ бўлмаган даражада амалга оширамиз.
Мен кабинетимнинг барча аъзоларига рекорд даражадаги инфляцияни енгиш, харажатлар ва нархларни тезда пасайтириш учун ўз ихтиёрларидаги улкан ваколатларни сафарбар қилишни буюраман. Инфляцион инқироз катта ва ортиқча харажатлар ҳамда энергия нархларининг ошиши билан боғлиқ эди, шунинг учун бугун мен энергетика соҳасида фавқулодда ҳолат эълон қиламан.
Америка яна ишлаб чиқарувчи мамлакатга айланади ва бизда бошқа ҳеч бир ишлаб чиқарувчи мамлакатда ҳеч қачон бўлмайдиган нарса бор: Ер юзидаги барча мамлакатлар орасида энг кўп нефть ва газ мавжуд ва биз бундан фойдаланамиз, улар бундан фойдаланмоқда. Биз нархларни пасайтирамиз, стратегик захираларимизни яна энг юқори даражагача тўлдирамиз ва Америка энергиясини бутун дунёга экспорт қиламиз.
Биз яна бой мамлакатга айланамиз ва айнан оёғимиз остидаги суюқ олтин бунга ёрдам беради.
Трамп, шунингдек, Байден давридаги Атроф-муҳитни муҳофаза қилиш агентлигининг стандарт ва оғир юкли транспорт воситаларидан чиқинди газларини тартибга солувчи қоидаларига ишора қилган баёнотда «Яшил янги келишувни тугатишини» ва «электр транспорт мандатини бекор қилишини» айтди, автомобилсозлик саноатини сақлаб қолиш ва буюк америкалик автомобилсозларга берган муқаддас ваъдасини бажаришини таъкидлади.
Бошқача айтганда, сиз ўз танловингиз бўйича автомобиль сотиб олишингиз мумкин. Биз яна Америкада автомобиллар ишлаб чиқаришни бир неча йил олдин ҳеч ким орзу қилолмаган суръатлар билан давом эттирамиз.
Мен америкалик ишчилар ва оилаларни ҳимоя қилиш учун савдо тизимимизни дарҳол қайта қуришни бошлайман. Бошқа мамлакатларни бойитиш учун фуқароларимизга солиқ солиш ўрнига, фуқароларимизни бойитиш учун хорижий давлатларга солиқ ва божлар соламиз.
Шу мақсадда биз барча тарифлар, божлар ва даромадларни йиғиш учун Ташқи даромадлар хизматини ташкил этамиз. Бу хорижий манбалардан ғазначилигимизга тушадиган жуда катта маблағлар бўлади. Америка орзуси тезда қайтади ва илгари ҳеч қачон бўлмаган даражада ўсади.
Федерал ҳукуматимизнинг ишончи ва самарадорлигини тиклаш учун менинг маъмуриятим мутлақо янги Ҳукумат самарадорлиги департаментини ташкил этади.
«Қонун ва сўз эркинлигининг қайтиши»
Сўз эркинлигини чеклаш бўйича кўп йиллик ноқонуний ва конституцияга хилоф федерал саъй-ҳаракатлардан сўнг мен ҳукуматнинг барча цензураларини зудлик билан тўхтатиш ва сўз эркинлигини Америкага қайтариш тўғрисидаги фармонни ҳам имзолайман. Давлатнинг улкан ҳокимияти энди ҳеч қачон сиёсий мухолифларни таъқиб қилиш учун қурол бўлмайди. Мен бу ҳақда кўп нарса биламан. Биз бундай бўлишига йўл қўймаймиз. Бу энди такрорланмайди.
Менинг раҳбарлигимда конституциявий ҳуқуқ устуворлигига мувофиқ адолатли, тенг ҳуқуқли ва холис одил судловни ҳамда шаҳарларимизда қонун ва тартибни тиклаймиз.
Шу ҳафта мен ҳукуматнинг ирқ ва жинсни жамият ва шахсий ҳаётнинг барча жабҳаларига ижтимоий сингдиришга уриниш сиёсатини ҳам тугатаман. Биз тери рангига эътибор бермайдиган ва хизмат натижаларига асосланган жамиятни барпо этамиз. Бугундан бошлаб Қўшма Штатлар ҳукуматининг расмий сиёсати фақат икки жинс мавжудлигига таянади: эркак ва аёл.
Ушбу ҳафтада мен COVID`га қарши мажбурий эмлашга қарши эътироз билдиргани учун Қуролли кучларимиздан ноҳақ бўшатилган барча ҳарбий хизматчиларни тўлиқ маош билан лавозимларига тиклайман. Ва мен аскарларимиз хизмат вазифаларини бажариш чоғида радикал сиёсий назариялар ва ижтимоий тажрибаларга дучор қилинмасликлари тўғрисидаги фармонни имзолайман. Қуролли кучларимиз ўз диққатини ягона вазифасига — Америка душманларини тор-мор этишга қаратиши мумкин.
2017 йилдаги каби, биз яна дунё кўрган энг кучли армияни қурамиз. Биз ўз муваффақиятимизни нафақат жанглардаги ғалабаларимиз билан, балки тугаллаган урушларимиз ва, эҳтимол, энг муҳими, ҳеч қачон қатнашмайдиган урушларимиз билан ҳам ўлчаймиз.
«Мен тинчликпарвар ва бирлаштирувчи бўлишни хоҳлайман»
Мен энг кўп фахрланадиган мерос тинчликпарвар ва бирлаштирувчи меросим бўлади, мен ана шундай бўлишни истайман, тинчликпарвар ва бирлаштирувчи. Шуни мамнуният билан маълум қиламанки, лавозимга киришишимдан бир кун олдин Яқин Шарқдаги гаровга олинганлар ўз оилалари бағрига қайтмоқда.
Америка Ер юзидаги энг буюк, энг қудратли ва энг ҳурматли, бутун дунёда илҳом ва ҳайрат уйғотувчи миллатнинг қонуний ўрнини қайтариб олади.
Тез орада биз Мексика кўрфазининг номини Америка кўрфазига ўзгартирамиз ва буюк президент Уильям Мак-Кинли номини Мак-Кинли тоғига қайтариб берамиз.
Америка кемалари жуда кўп ҳақ тўлайди ва уларга адолатсизлик билан муносабатда бўлишади. Бу АҚШ Ҳарбий-денгиз кучларига ҳам тегишли. Панама каналини Хитой бошқармоқда, биз эса уни Хитойга бермагандик, Панамага бергандик ва энди уни қайтариб оламиз.
Биз биргаликда сурункали касалликлар эпидемиясига чек қўямиз ва фарзандларимизни хавфсиз, соғлом ва касалликлардан холи тарзда сақлаймиз. Қўшма Штатлар яна ўзини бойлигимизни оширадиган, ҳудудларимизни кенгайтирадиган, шаҳарлар қурадиган, умидларимизни оширадиган ва байроғимизни янги ва гўзал уфқларга олиб чиқадиган мамлакат деб билади.
Биз америкалик астронавтларни Марс сайёрасига юлдузли ва йўл-йўл байроқни ўрнатиш учун юбориб, юлдузлар томон йўлни давом эттирамиз.
Агар бирлашсак, қўлимиздан келмайдиган нарсанинг ўзи йўқ, амалга ошмайдиган орзу ҳам йўқ. Кўпчилик мен учун бундай тарихий сиёсий қайтишни ташкил этиш мумкин эмас, деб ўйларди. Лекин бугун кўриб турибсизки, мен шу ердаман, Америка халқи ўз сўзини айтди. Ҳозир сизнинг олдингизда турибман, бу эса бирор нарсани қилиш имконсиз, деб ишонмаслигингиз кераклигининг исботидир.
Сўнгги йилларда мамлакатимиз жуда кўп азият чекди, лекин биз уни яна буюк, ҳар қачонгидан ҳам улуғроқ қиламиз. Биз раҳм-шафқат, жасорат ва ўзига хосликка тўла миллат бўламиз. Бизнинг кучимиз барча урушларни тўхтатади ва ёвуз, шафқатсиз ҳамда олдиндан айтиб бўлмайдиган дунёга янги бирлик руҳини олиб келади…
