Ўзбекистон футбол ассоциацияси президенти Абдусалом Азизов лавозимини тарк этди. «Газета.uz»га манбаси бу маълумотни тасдиқлади.
Осиё футбол конфедерасияси (ОФК) сайтидаги маълумотларга кўра, ЎФА президенти вазифасини вақтинчалик ташкилотнинг биринчи вице-президенти Равшан Ирматов бажариб келмоқда.
ЎФА ўзининг Telegram каналида 22 февраль куни ассоциациянинг навбатдан ташқари сайлов Конгресси бўлиб ўтиши ва унгача ташкилот президенти вазифасини биринчи вице-президент (Равшан Ирматов) бажариб туриши ҳақида хабар берди. ЎФАнинг янги раҳбарини сайлаш жараёни бир ойдан кейин бўлиб ўтади.
Абдусалом Азизов бу лавозимга бош вазирнинг биринчи ўринбосари Очилбай Раматов ўрнига келган ва 2019 йил июль ойидан буён ассоциацияни бошқариб келаётганди. 2021 йил сентябрида Азизов бу лавозимга қайта сайланган.
Ўтган йилнинг ноябрь ойида Абдусалом Азизов Давлат хавфсизлик хизмати (ДХХ) раиси лавозимидан озод этилганди. Декабрь ойи бошида у президентнинг ёшлар масалалари бўйича маслаҳатчиси ўринбосари бўлди.
