20 январь куни «Манчестер Сити» клуби ўзининг расмий саҳифаларида Абдуқодир Ҳусановни жамоага қўшиб олганини эълон қилди. Ўзбекистонлик футболчи «шаҳарликлар» билан 2029 йил июнигача мўлжалланган шартнома имзолади. Шу тариқа Абдуқодир АПЛдаги биринчи ўзбек футболчисига айланди.
Клуб расмий саҳифаларида футболчининг «Манчестер Сити» ҳимоячиси сифатидаги илк расмий интервьюси эълон қилинди. «Газета.uz» қуйида суҳбатни матнли шаклда келтириб ўтади.
Абдуқодир, «Манчестер Сити»га хуш келибсиз. Бизнинг футболчиларимиздан бирига айланиш қандай бўлар экан?
Мен бу жамоага қўшилганимдан жуда ҳам хурсандман. Бу жамоа — дунёнинг энг яхши жамоаларидан бири. Мен бу ерга соврин ютгани келдим.
Бу сиз учун айни вақтдаги тўғри қарор эканига амин бўлишингизга нима сабаб бўлди?
Бу жамоа — жуда катта жамоа. Мураббийи энг яхши мураббийлардан бири. Шунинг учун келдим.
Шу вақтгача босиб ўтган каръера йўлингиз ҳақида гапириб бера оласизми?
Мен биринчи «ТошКуч» деган жамоадан бошлаганман. «ТошКуч»дан «Бунёдкор» академиясига ўтганман. «Бунёдкор» академиясидан сўнг профессионал футболни Беларусда бошлаганман. 18 ёшимда у ердан Францияга, Франциядан эса мана «Манчестер Сити»га.
Нима учун 45-рақамни танладингиз? Аввал ҳам бу рақам остида ўйнаганмисиз ёки бунинг бошқа сабаби борми?
Профессионал футболни Беларусда 45-рақамда бошлаганман. Шунинг учун 45-рақамни танладим.
Сизнинг ўсишингиз жуда тез кечди. Жуда кўп жамоалар сизга қизиқаётгани бўйича баёнотлар берилди. Нима учун сизни кузатаётган шунча клуб бўла туриб ҳам «Сити»ни танладингиз?
Айтиб ўтганимдек, [Манчестер Сити] энг яхши жамоа, [Пеп Гвардиола] энг яхши мураббий, [АПЛ] энг яхши чемпионат.
Ўтган йил давомида ёки ундан аввал «Сити»нинг кўплаб ўйинларини кўришга имкон бўлганмиди? Бизнинг футбол ўйнаш услубимиз ҳақида қандай фикрдасиз?
«Манчестер Сити»нинг ўйинларини кўриб келаман. Ёшлигимда ҳам кўрганман. Ўйини зўр, бошқача, ҳамманикига ўхшамайдиган.
Пеп Гвардиола билан ишлаш имконига эга бўлиш қанчалик муҳим? «Сити»га келиш қарорида бу ҳам муҳим омил бўлдими?
Мен ҳар доим энг яхшисини танлаганман. Ҳозир ҳам энг яхшиси билан ишлаш учун келдим.
Янги мамлакат, янги лига. Ҳаётингиздаги бу барча янги чақириқлар олдида қанчалик ҳаяжонланяпсиз? Ахир сиз атиги 20 ёшдасиз, ёшсиз.
Мен ҳар доим қийинчиликлар билан келганман. Ҳеч нарсада тўхташ йўқ.
Сиз Премьер лигада ўйнайдиган илк ўзбек футболчисига айланасиз. Бу сиз ва оилангиз учун жуда шарафли онлар бўлса керак. Уйингизда [бу воқеаларга] муносабат қандай бўлди?
Бу нафақат ман учун, балки Ўзбекистон учун. Англияда биринчи ўзбек, бу ҳали бошланиши. Ўзбеклар кўп келишади.
Ўзбекистон жаҳон чемпионатида ҳеч қачон ўйнамаган. Лекин сизларда 2026 йилги Жаҳон чемпионатига йўлланмани қўлга киритиш имконияти бор. Мамлакатингиздаги футбол ва у қандай ривожланаётгани ҳақида бизга озгина гапириб бера оласизми?
Ўзбекистонда футболга эътибор жуда катта бўляпти. Шу муносабат билан ҳамма Жаҳон чемпионатига чиқишимизни ўйлаяпти ва хоҳлаяпти. Чиқишимизга бир қадам қолди.
Сизнинг отангиз ҳам профессионал футболчи бўлган. Карьерангизга у инсон қанчалик катта таъсир ўтказган?
Мен дадам қандай футбол ўйнаётганларини кўрганман. Менда ҳам қизиқиш бўлган, борганман. Ва ҳозир бу даражага чиқишимда ҳам дадам катта роль ўйнайдилар. Ҳар ўйиндан кейин, ҳатто машғулотлардан кейин хатоларни битта-битта гаплашиб ўтирамиз.
Сўнгги савол: Бу мавсум учун шахсий ва «Сити» футболчиси сифатидаги режаларингиз қандай?
Мен бу ерга ўсиш учун ва соврин ютиш учун келдим.
Раҳмат Абдуқодир, «Манчестер Сити» футболчиси сифатидаги карьерангизда омад!
Сизга ҳам катта раҳмат.
Интервьюни видео кўринишида қуйидаги ҳавола орқали томоша қилиш мумкин (суҳбатда саволлар инглиз тилида берилган, Абдуқодир Ҳусанов уларга ўзбек тилида жавоб берган).
