Олий Мажлис Қонунчилик палатаси Миллий гвардия фаолиятини такомиллаштиришга қаратилган қонун лойиҳасини биринчи ўқишда қилди. Бу ҳақда парламент қуйи палатаси матбуот хизмати хабар берди.
Миллий гвардия қўмондони ўринбосари Сарвар Мамаюсупов «Янги Ўзбекистондаги стратегик ислоҳотлар» доирасида 2017 йил 4 августда Миллий гвардия ташкил этилганини эслатиб ўтди.
2020 йил 18 ноябрда «Миллий гвардия тўғрисида»ги қонун қабул қилиниб, унинг мақоми белгиланди. Бугунги кунгача Миллий гвардия органлари фаолиятига доир 17 та қонун, 50 дан ортиқ фармон ва қарорлар қабул қилиниб, унга бир қатор янги вазифа ва функциялар юклатилган.
Янги қонун лойиҳаси билан қонуннинг 3-моддасида Миллий гвардия органларининг вазифалари тизимлаштирилди. Яна бир янги мажбурият киритилмоқда.
Амалдаги қонунчиликда Миллий гвардия ходими хизмат вазифасини бажараётганда, фуқарога мурожаат қилганда ёки фуқаро унга мурожаат қилганда ўзини таништириши шарт бўлган тартиб белгиланмаган эди.
Янги таҳрирдаги Конституция талабларидан келиб чиқиб, «Миллий гвардия тўғрисида»ги қонуннинг «Фуқароларнинг ҳуқуқлари, эркинликлари ва қонуний манфаатларига риоя этиш ҳамда уларни ҳурмат қилиш принципи» деб номланган 6-моддаси Миллий гвардия органи ҳарбий хизматчисининг (ходимининг) фуқарога мурожаат қилганда ўзини таништириши, шунингдек, унинг ҳуқуқ ва мажбуриятларини тушунтириши шартлиги тўғрисидаги норма билан тўлдирилмоқда.
Сарвар Мамаюсуповнинг айтишича, қонун лойиҳаси президент Давлат хавфсизлик хизмати, Давлат хавфсизлик хизмати, Олий суд, Бош прокуратура, Фавқулодда вазиятлар вазирлиги, Ички ишлар вазирлиги, Мудофаа вазирлиги, Иқтисодиёт ва молия вазирлиги билан келишилган.
Депутат Руслан Собиров Миллий гвардия вазифаларидан жиноят иши қўзғатиш банди чиқариб ташланишига эътибор қаратди.
Миллий гвардия ҳуқуқшуноси Очилов жавоб бериб, жиноят ишини қўзғатиш бўйича процессуал ваколатлар Жиноят-процессуал кодексида аниқ мансабдор шахсларга берилганини таъкидлади. Унинг сўзларига кўра, «бу келгусида қонунчиликка халақит бермайди ва такрорлашнинг ҳожати йўқ».
«Бу терговга қадар текширувни амалга ошириш, суриштирув ўтказиш доирасида бажариладиган иш. Масалан, жиноят ишини қўзғатиш билан бирга жиноят ишини қўзғатишни рад этиш ёки ишни бошқа органга ўтказиш функциялари ҳам бажарилади. Бу асосий вазифа эмас ва бу процессуал қонунчиликда мустаҳкамлаб қўйилган», — деди у.
Депутатлар қонун лойиҳасини биринчи ўқишда бир овоздан қабул қилди: 135 киши «ёқлади», ҳеч ким бетараф қолмади ва қарши овоз бермади. Энди ҳужжат Қонунчилик палатаси қўмитасида кўриб чиқилади ва кейинчалик иккинчи ўқишда муҳокама қилинади.
2023 йил май ойида президент Миллий гвардия ходимларининг ваколатларини кенгайтириш тўғрисидаги қонунни имзолаганди. Унга кўра, уларга жамоат жойларида спиртли ичимликларни истеъмол қилганлик, вояга етмаган шахсни ғайриижтимоий хатти-ҳаракатларга жалб қилганлик ва бошқа ҳолатлар учун жарима солиш ҳуқуқи берилган. Шунингдек, улар Маъмурий жавобгарлик тўғрисидаги кодекснинг айрим моддаларига оид баённомаларни расмийлаштириш ҳуқуқига эга бўлган.
