Туркиянинг Болу провинциясидаги Карталкая тоғ-чанғи курортида чиққан ёнғин қурбонлари сони 66 тага етди, 51 киши жароҳатланган.
Daily Sabah нашрининг ёзишича, ўт ўчириш ишларига меҳмонхонанинг тоғли ҳудудда жойлашгани тўсқинлик қилган ва ўт ўчирувчиларнинг унга етиб бориши қийин бўлган. «Мен одамларнинг деразадан ёрдам сўраб қичқиришларини эшитдим. Арқон, ёстиқ ва кўрпа олиб келдик. Ўт ўчирувчилар етиб келгунига қадар икки аёл юқори қаватдан сакраб тушган», — деди журналистларга қўшни меҳмонхона ходими Бариш Салгюр.
Соғлиқни сақлаш вазири Кемал Мемишоғлу ёнғинда жароҳатланган 51 кишидан бирининг реанимацияда даволанаётганини, 17 киши эса шифохонадан чиқарилганини маълум қилди.
Адлия вазири Йилмаз Тунч меҳмонхонадаги ёнғин билан боғлиқ тергов доирасида 4 киши, жумладан, бизнес эгаси ҳам қўлга олинганини билдирди.
Ёнғин 21 январга ўтар кечаси 11 қаватли меҳмонхонанинг тўртинчи қаватида бошланган. Ёнғинни ўчиришда 200 дан ортиқ қутқарувчилар иштирок этган.
Болу вилояти раҳбари Абдулазиз Айдин ёнғин сабаби ҳозирча аниқланмаганини айтди. Унинг сўзларига кўра, ёнғин ресторан жойлашган қаватда бошланган. Ҳодиса содир бўлган пайтда бинода 234 нафар меҳмон бўлган. Меҳмонхонада қанча ходим бўлгани аниқлаштирилмаган.
