Туркиянинг Болу музофотида чиққан ёнғин оқибатида ҳалок бўлганлар сони 76 кишига етди, 52 киши жароҳат олган, деб хабар бермоқда Daily Sabah.
Ички ишлар вазири Али Ерликая Карталкая чанғи марказидаги меҳмонхонада содир бўлган ёнғинга алоқадор 9 кишининг қўлга олинганини маълум қилди ва у фалокат учун жавобгар бўлган ҳар бир кишини жавобгарликка тортишга ваъда берди. Ушланганлар орасида бизнес эгаси ҳам бор.
Соғлиқни сақлаш вазири Кемал Мемишоғлу жароҳатланганларнинг камида бир нафари оғир аҳволда экани, 17 нафар жабрланувчи шифохонадан чиқарилганини маълум қилди.
Президент Эрдоған ёнғин туфайли мамлакатда бир кунлик (22 январь) миллий мотам эълон қилди.
Мамлакатда мотам туфайли туширилган байроқлар.
- Ёнғин 21 январга ўтар кечаси 11 қаватли меҳмонхонанинг тўртинчи қаватида бошланган. Ёнғинни ўчиришда 200 дан ортиқ қутқарувчилар иштирок этган. Меҳмонхонанинг жойлашуви ёнғинларни назорат қилишга уринаётган ўт ўчирувчилар учун катта қийинчиликлар туғдирган.
- Ўзбекистон президенти ёнғин чиққани ва одамлар ҳалок бўлгани юзасидан мамлакат етакчисига таъзия йўллади.
- Ўзбекистон элчихонаси жабрланганлар ва ҳалок бўлганлар орасида ўзбекистонликлар йўқлигини маълум қилди.
